അഗളി: അട്ടപ്പാടിയില് സംസ്ഥാന ഭക്ഷ്യ സുരക്ഷ കമീഷന്റെ മിന്നല് പരിശോധന. ഭക്ഷ്യ സുരക്ഷ കമീഷന് അംഗം എസ്.
രമേശനാണ് അട്ടപ്പാടിയിലെത്തി ആദിവാസികളോട് നേരിട്ട് പ്രശ്നങ്ങള് കേട്ടത്.
ഊരുകള് സന്ദര്ശിച്ച് സമൂഹ അടുക്കളകളുടെ പ്രവര്ത്തനം വിലയിരുത്തി. അംഗന്വാടികളിലും സ്കൂളുകളിലും നടക്കുന്ന പോഷകാഹാര വിതരണം സംബന്ധിച്ചും പരിശോധന നടത്തി. ഉദ്യോഗസ്ഥര് അടക്കമുള്ളവരെ മുന്കൂട്ടി അറിയിക്കാതെ ആയിരുന്നു സന്ദര്ശനം.
അട്ടപ്പാടിയിലെ സമൂഹ അടുക്കളയുടെ പ്രവര്ത്തനം സംബന്ധിച്ച് റിപ്പോര്ട്ട് സര്ക്കാറിന് നല്കും.
മേലേ മുള്ളിയില് പ്രവൃത്തിക്കുന്ന 121ാം നമ്ബര് റേഷന് കടയില്നിന്ന് ആദിവാസികള്ക്ക് മാസംതോറും നല്കേണ്ട ഗോതമ്ബ് നല്കുന്നില്ലെന്ന് കണ്ടെത്തി. പുഴുവും ചെള്ളും നിറഞ്ഞ ഭക്ഷ്യധാന്യങ്ങളാണ് ഇവിടെനിന്നും വിതരണം ചെയ്യുന്നത്.
റേഷന് കടയുടെ ഭിത്തികള് മുഴുവന് ചെള്ള് നിറഞ്ഞ അവസ്ഥയിലായിരുന്നു. ഇതുസംബന്ധിധിച്ച് ജില്ല സിവില് സപ്ലെ ഓഫിസറോട് അടിയന്തരമായി അന്വേഷണം നടത്തി റിപ്പോര്ട്ട് നല്കാന് കമീഷന് ആവശ്യപ്പെട്ടു.