കോഴിക്കോട്: സി.പി.എം ആഭിമുഖ്യമുള്ള പുരോഗമന കലാസാഹിത്യസംഘത്തിന്‍റെ (പു.ക.സ) ചടങ്ങില്‍ നടന്‍ ഹരീഷ് പേരടിയെ വിലക്കിയത് വിവാദമാകുന്നു.
സി.പി.എമ്മിനും മുഖ്യമന്ത്രി പിണറായി വിജയനുമെതിരായ ഫേസ്ബുക്ക് പോസ്റ്റുകളാണ് ഹരീഷിനെ വിലക്കാന്‍ കാരണം. പ്രമുഖ നാടകപ്രവര്‍ത്തകന്‍ എ. ശാന്തകുമാറിന്‍റെ ചരമവാര്‍ഷികത്തോടനുബന്ധിച്ച്‌ ‘ശാന്തനോര്‍മ’എന്ന പേരില്‍ കോഴിക്കോട് ടൗണ്‍ഹാളില്‍ നാല് ദിവസത്തെ പരിപാടികളില്‍ വ്യാഴാഴ്ച അനുസ്മരണ സദസ് ഉദ്ഘാടനം ചെയ്യേണ്ടിയിരുന്നത് ഹരീഷ് പേരടിയായിരുന്നു. എന്നാല്‍, പങ്കെടുക്കേണ്ടതില്ലെന്ന് പു.ക.സ നേതാക്കള്‍ അറിയിക്കുകയായിരുന്നു. ചടങ്ങിലെ മുഖ്യാതിഥിയാകേണ്ടിയിരുന്ന സുധീഷിനെ ഉദ്ഘാടകനാക്കിയാണ് ഹരീഷിനെ ഒഴിവാക്കിയത്.
കോയമ്ബത്തൂരിലെ സിനിമ സെറ്റില്‍ നിന്ന് അവധി ചോദിച്ച്‌ എറണാകുളത്തെ വീട്ടിലെത്തിയ ശേഷം ഭാര്യ ബിന്ദുവിനെയും കൂട്ടി കോഴിക്കോട്ടേക്ക് തിരിക്കുന്നതിനിടെയാണ് സംഘാടകര്‍ വിളിച്ചതെന്ന് ഹരീഷ് പേരടി ഫേസ്ബുക്കില്‍ കുറിച്ചു. പ്രത്യേക രാഷ്ട്രിയ സാഹചര്യത്തില്‍ ഹരീഷ് ഈ പരിപാടിയില്‍ പങ്കെടുക്കാതിരിക്കുന്നതാണ് നല്ലത് എന്ന സ്നേഹം പൊതിഞ്ഞ വാക്കുകളായിരുന്നു അവര്‍ പറഞ്ഞതെന്ന് ഹരീഷ് എഴുതുന്നു.
ശാന്തനെയോര്‍ക്കാന്‍ തനിക്ക് ഒരു സംഘടനയുടെയും സൗജന്യം ആവിശ്യമില്ലയെന്നും ഹരീഷ് പറയുന്നു. ശാന്തകുമാറിന്‍റെ പ്രശസ്തമായ ‘പെരുംകൊല്ലന്‍’ എന്ന നാടകത്തിലെ ‘ദാമേട്ടാ സത്യങ്ങള്‍ വിളിച്ചു പറയാന്‍ എനിക്കെന്‍റെ ചൂണ്ടുവിരല്‍ വേണം’ എന്ന വാചകത്തോടെയാണ് ഫേസ്ബുക്ക് കുറിപ്പ് അവസാനിപ്പിക്കുന്നത്.
പിണറായി വിജയനെതിരായ പ്രതിഷേധവും കറുത്ത മാസ്ക് നിരോധിക്കലും കൊടുമ്ബിരികൊണ്ട കഴിഞ്ഞ ഞായറാഴ്ച ഹരീഷ് പേരടി ഫേസ്ബുക്കില്‍ പിണറായിക്കെതിരെ പരോക്ഷമായ പോസ്റ്റ് ഇട്ടിരുന്നു. ഒ.വി വിജയന്‍റെ പ്രശസ്തമായ ‘ധര്‍മപുരാണം’നോവലിലെ ആദ്യ പേജിലെ വാചകങ്ങള്‍ ഫേസ്ബുക്കില്‍ പങ്കുവെച്ചിരുന്നു.
‘നിങ്ങളാരും വായിച്ചില്ലെങ്കിലും സഖാവ് കുഞ്ഞിക്കണ്ണേട്ടന്‍ വായിച്ചോളും’ എന്നും എഴുതിയിരുന്നു. കോഴിക്കോട്ടെ സി.പി.എം ജില്ല സെക്രട്ടറിയറ്റ് അംഗമായ കെ.ടി കുഞ്ഞിക്കണ്ണനെയാണ് നടന്‍ ഉദ്ദേശിച്ചതെന്നാണ് സൂചന. അതേസമയം, പിണറായിക്കെതിരെ ‘ധര്‍മപുരാണം’നോവലിലെ വാചകങ്ങള്‍പോസ്റ്റായി ഇട്ടതാണ് വിലക്കാന്‍ കാരണമെന്ന് ജില്ലയിലെ പൂ.ക.സ നേതാവ് ഹേമന്ദ് കുമാര്‍ പറഞ്ഞു.
മുഖ്യമന്ത്രി പിണറായി വിജയന്‍ യാത്ര ചെയ്യുന്ന വിമാനത്തിലെ പ്രതിഷേധവും മുതിര്‍ന്ന കോണ്‍ഗ്രസ്സ് നേതാവ് എ.കെ ആന്‍റ്റണി ഇരിക്കുമ്ബോള്‍ കോണ്‍ഗ്രസ് ഓഫീസിനുനേരെയുള്ള ആക്രമണവും പ്രതിഷേധാര്‍ഹമാണെന്നും ഹരീഷ് കഴിഞ്ഞ ദിവസം അഭിപ്രായപ്പെട്ടിരുന്നു. സിനിമ നടന്മാരുടെ സംഘടനയായ അമ്മയില്‍ നിന്ന് രാജിവെച്ച ഹരീഷ് ഫേസ്ബുക്കില്‍ ധീരമായ അഭിപ്രായപ്രകടനങ്ങള്‍ നടത്തുന്ന അപൂര്‍വം നടനാണ്.
