കുന്നംകുളം: ഗവ. മോഡല് ഗേള്സ് ഹയര് സെക്കന്ഡറി സ്കൂളിലെ ഏഴാം ക്ലാസ് വിദ്യാര്ഥിനിക്ക് തെരുവ് നായുടെ കടിയേറ്റു.
കുറുക്കന്പാറ ചീനിക്കല് വീട്ടില് ബാബുവിന്റെ മകള് എബിയക്കാണ് (12) സ്കൂള് വളപ്പില്നിന്നും വ്യാഴാഴ്ച രാവിലെ കടിയേറ്റത്. ക്ലാസ് ആരംഭിക്കുന്നതിന് മുമ്ബായിരുന്നു സംഭവം. സഹോദരി നിബിയ, കൂട്ടുകാരി നിരഞ്ജന എന്നിവര്ക്കൊപ്പം വരുമ്ബോഴാണ് നായുടെ ആക്രമണമുണ്ടായത്.
ഇടതു കൈത്തണ്ടയ്ക്കും വലതുകൈയിലെ വിരലുകള്ക്കുമാണ് പരിക്കേറ്റത്. സ്കൂള് വളപ്പില് തെരുവുനായ്ക്കളുടെ ശല്യം രൂക്ഷമാണ്. ഇവിടെ അലഞ്ഞുതിരിഞ്ഞു നടക്കുന്ന നായയാണ് കുട്ടിയെ ഓടിവന്ന് കടിച്ചത്. ഉടനെ അധ്യാപകര് കുന്നംകുളം താലൂക്ക് ആശുപത്രിയിലും പിന്നീട് തൃശൂര് മെഡിക്കല് കോളജിലും എത്തിക്കുകയായിരുന്നു.
ഗേള്സ് ഹൈസ്കൂള് വളപ്പിലെ എല്.പി വിഭാഗം ഭാഗത്തും തെരുവുനായ്ക്കളുടെ ശല്യം രൂക്ഷമാണ്. തെരുവ് നായ്ക്കളുടെ ശല്യം സംബന്ധിച്ച് പലതവണ അധികൃതര്ക്ക് പരാതി നല്കിയിട്ടും ഒരു നടപടിയും ഇതുവരെ ഉണ്ടായിട്ടില്ലെന്ന് ആക്ഷേപമുണ്ട്. തെരുവ് നായ ശല്യത്തിന് പരിഹാരം കണ്ടെത്താന് വെള്ളിയാഴ്ച സ്കൂളില് അടിയന്തര യോഗം വിളിച്ചുചേര്ക്കുമെന്ന് അധികാരികള് വ്യക്തമാക്കി.