റിയാദ്: പാകിസ്താനും ഇറാനും ഇറാഖും കുവൈത്തും താണ്ടി മക്കയിലെത്താന്‍ കാല്‍നടയായി മലപ്പുറത്തുനിന്ന് ഹജ്ജിന് പുറപ്പെട്ട ശിഹാബിന്റെ ആത്മീയ സാഹസിക യാത്ര അറബ് ലോകത്തും വൈറല്‍.
അറബ് മാധ്യമങ്ങളിലും സമൂഹമാധ്യമങ്ങളിലുമെല്ലാം നിറയുകയാണ് മലയാളി യുവാവിന്റെ നടത്തം. സൗദി അറേബ്യയിലെ ‘അഖ്ബാര്‍ 24’ ഉള്‍െപ്പടെ നിരവധി ചെറുതും വലുതുമായ മാധ്യമങ്ങളാണ് മക്കയിലേക്കുള്ള പാതയില്‍ നടന്നുതുടങ്ങിയ ശിഹാബിന്റെ യാത്ര വലിയ പ്രാധാന്യത്തോടെ വാര്‍ത്തയാക്കിയിരിക്കുന്നത്. മക്ക, മദീന ഹറമുകളില്‍ നിന്നുള്ള വാര്‍ത്തകള്‍ മാത്രം പ്രസിദ്ധീകരിക്കുന്ന, ലക്ഷക്കണക്കിനാളുകള്‍ പിന്തുടരുന്ന ‘ഹറമൈന്‍’ എന്ന ട്വിറ്റര്‍ അക്കൗണ്ടുള്‍പ്പെടെയുള്ള സമൂഹമാധ്യമ ചുവരുകളിലും ശിഹാബിന്റെ യാത്രയെ കുറിച്ചുള്ള വാര്‍ത്തകള്‍ നിറഞ്ഞിരിക്കുന്നു. ചിത്രമായും എഴുത്തായും തെളിയുന്ന പോസ്റ്റുകള്‍ക്ക് താഴെ യോജിപ്പും വിയോജിപ്പും അഭിനന്ദനവും പ്രാര്‍ഥനയുമായി ആളുകള്‍ എത്തുന്നു.
കെട്ടിക്കൂട്ട് പാട്ടുകളും കവിതകളും ചൊല്ലി നാട്ടില്‍ ശിഹാബിന് ലഭിക്കുന്ന സ്വീകരണത്തിന്റെ വിഡിയോ അടക്കം പോസ്റ്റ് ചെയ്ത് ഇത്തരം യാത്രകള്‍ പ്രോത്സാഹിപ്പിക്കരുതെന്ന കമന്റുകളുമുണ്ട് കൂട്ടത്തില്‍. 8,640 കിലോമീറ്റര്‍ ദൂരം നടന്നുതാണ്ടിയാണ് ശിഹാബ് മക്കയില്‍ എത്താന്‍ പദ്ധതിയിട്ടിരിക്കുന്നത്. മണിക്കൂറില്‍ ഏഴ് കിലോമീറ്റര്‍ നടക്കാന്‍ ശിഹാബ് പരിശീലനം നേടിയിട്ടുണ്ട്. ദിനേന 31 കിലോമീറ്റര്‍ എങ്കിലും നടന്നാലേ 280 ദിവസം കൊണ്ട് മക്കയിലെത്താനാകൂ.
ഇപ്പോള്‍ കൊടും ചൂടാണ് സൗദിയിലെങ്കിലും നടന്നെത്താന്‍ മാസങ്ങളേറെയുണ്ടല്ലോ, അപ്പോഴേക്കും കാലാവസ്ഥ മാറി തണുപ്പാകും എന്നുകരുതി ആശ്വസിക്കാനാവില്ല. സൗദിയിലേക്ക് പ്രവേശിക്കാനാകുമ്ബോള്‍ ഋതുക്കളെല്ലാം ഒരു തവണ മാറിമറിഞ്ഞ് വീണ്ടും വേനലിലേക്കെത്താനാണ് സാധ്യത. അടുത്ത വര്‍ഷം ഹജ്ജ് ജൂണ്‍ മാസത്തിലാണ്. സൗദിയില്‍ ചൂട് ഉച്ചിയിലെത്തുന്ന സമയമാണത്. ഈ പ്രതിസന്ധികളെയെല്ലാം അതിജീവിച്ചാണ് ശിഹാബ് പുണ്യഭൂമിയില്‍ എത്തേണ്ടത്. അതുകൊണ്ടുതന്നെയാണ് മക്കയിലേക്കുള്ള പാതയിലെ ശിഹാബിന്റെ നടത്ത പദ്ധതിക്ക് ഇത്രയധികം പ്രാധാന്യവും ഗൗരവവും ലഭിക്കുന്നത്. ശിഹാബ് സൗദിയിലേക്ക് പ്രവേശിക്കുന്നത് കാത്തിരിക്കുകയാണ് ഇവിടത്തെ മലയാളി സമൂഹം
