മനാമ: ലോകത്തിലെ ഏറ്റവും മികച്ച പുതിയ വിമാനത്താവളം എന്ന പദവി ബഹ്റൈന് അന്താരാഷ്ട്ര വിമാനത്താവളത്തിന്.
പാരിസിലെ പാസഞ്ചര് ടെര്മിനല് എക്സ്പോയില് നടന്ന സ്കൈട്രാക്സ് 2022 ലോക എയര്പോര്ട്ട് അവാര്ഡ് ദാന ചടങ്ങിലാണ് ബഹ്റൈന് വിമാനത്താവളത്തിന് പുരസ്കാരം ലഭിച്ചത്. വ്യോമഗതാഗതരംഗത്തെ ഏറ്റവും മികച്ച അവലോകന സമിതിയാണ് സ്കൈട്രാക്സ്. ഇതിനുമുമ്ബ് സ്കൈട്രാക്സ് റേറ്റിങ്ങില് പഞ്ചനക്ഷത്ര പദവി വിമാനത്താവളത്തിന് ലഭിച്ചിരുന്നു. ഈ ബഹുമതി ലഭിക്കുന്ന മിഡിലീസ്റ്റിലെ മൂന്നാമത്തെ വിമാനത്താവളമെന്ന ഖ്യാതിയും നേടി. കോവിഡ് സുരക്ഷ നടപടികള്ക്കും വിമാനത്താവളത്തിലെ പേള് ലോഞ്ചിനും പഞ്ചനക്ഷത്ര റേറ്റിങ് ലഭിച്ചിട്ടുണ്ട്.
രൂപകല്പനയിലും ഗുണമേന്മയിലും വിട്ടുവീഴ്ച ചെയ്യാതെ റെക്കോഡ് വേഗത്തില് പുതിയ ടെര്മിനല് നിര്മാണം പൂര്ത്തിയാക്കാന് സാധിച്ചതിനുള്ള അംഗീകാരമാണ് ബഹുമതിയെന്ന് ബഹ്റൈന് എയര്പോര്ട്ട് കമ്ബനി ചെയര്മാന് കമാല് ബിന് അഹ്മദ് മുഹമ്മദ് പറഞ്ഞു. കോവിഡ് മഹാമാരിയുടെ വെല്ലുവിളികള്ക്കിടയിലും നിര്മാണം പൂര്ത്തിയാക്കാന് കഴിഞ്ഞത് ബഹ്റൈനി ടീമിന്റെ നേട്ടമാണ്. പദ്ധതിയുടെ പിന്നില് പ്രവര്ത്തിച്ച ഓരോരുത്തര്ക്കും അഭിമാനിക്കാമെന്നും അദ്ദേഹം കൂട്ടിച്ചേര്ത്തു.