മേപ്പാടി: പുഴയില് ഒഴുക്കില്പ്പെട്ട ദമ്ബതികളില് യുവതി മരിച്ചു. തമിഴ്നാട് സേലം സ്വദേശിനി യൂനിസ് നെല്സന് (31) ആണ് മരിച്ചത്.
നാട്ടുകാര് രക്ഷപ്പെടുത്തിയശേഷം ആശുപത്രിയില് ചികിത്സയിലായിരുന്നു യുവതി.
വയനാട് മേപ്പാടി എളമ്ബിലേരിയില് വ്യാഴാഴ്ച വൈകുന്നേരം അഞ്ചരയോടെയാണ് അപകടമുണ്ടായത്. ഭര്ത്താവ് സനിയല് സഗയരാജിനൊപ്പം എളമ്ബിലേരിയിലെ റിസോര്ട്ടില് എത്തിയതായിരുന്നു യൂനിസ്. ചിത്രങ്ങള് പകര്ത്തുന്നതിനിടെ അബദ്ധത്തില് പുഴയില് വീഴുകയായിരുന്നുവെന്നാണ് സൂചന.
സമീപത്തുണ്ടായിരുന്നവരാണ് ഇരുവരെയും കരകയറ്റി മേപ്പാടി അരപ്പറ്റയിലെ സ്വകാര്യ മെഡിക്കല് കോളജ് ആശുപത്രിയിലെത്തിച്ചത്. മൃതദേഹം പോസ്റ്റ്മോര്ട്ടത്തിനായി ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.