ദോഹ: നവംബര് 21 മുതല് ഡിസംബര് 18 വരെ മിഡിലീസ്റ്റില് ആദ്യമായെത്തുന്ന ഫിഫ ലോകകപ്പ് ഫുട്ബാളിന് ഖത്തര് ആതിഥ്യമരുളുമ്ബോള് സുരക്ഷ പിന്തുണ നല്കാന് സന്നദ്ധത പ്രകടിപ്പിച്ച് നാറ്റോ (നോര്ത്ത് അത്ലാന്റിക് ട്രീറ്റി ഓര്ഗനൈസേഷന്) രംഗത്ത്.
കെമിക്കല്, ബയോളജിക്കല്, റേഡിയോളജിക്കല്, ന്യൂക്ലിയര് മെറ്റീരിയലുകള് ഉയര്ത്തുന്ന ഭീഷണിക്കെതിരായ പരിശീലനമുള്പ്പെടെയായിരിക്കും സുരക്ഷാ പിന്തുണയെന്ന് പ്രസ്താവനയില് നാറ്റോ വ്യക്തമാക്കി. പ്രധാനപ്പെട്ട (വി.ഐ.പി) വ്യക്തികളുടെ സുരക്ഷ, സ്ഫോടക വസ്തുക്കള് ഉയര്ത്തുന്ന ഭീഷണികളെ പ്രതിരോധിക്കുക തുടങ്ങിയവയിലെ പരിശീലനവും ഇതിലുള്പ്പെടുമെന്നും സഖ്യം സൂചിപ്പിച്ചു. നിരവധി വര്ഷമായി ഖത്തര് നാറ്റോയുടെ പ്രധാന പങ്കാളിയാണെന്നും പ്രസ്താവനയില് ചൂണ്ടിക്കാട്ടി. ലോകത്തെ ഏറ്റവും വലിയ കായികമാമാങ്കമായ ലോകകപ്പിന് പഴുതടച്ച സുരക്ഷാ സംവിധാനമാണ് ഖത്തര് ഒരുക്കുന്നത്. വിവിധ രാജ്യങ്ങളിലെ സേനാവിഭാഗങ്ങളുടെ സഹകരണത്തോടെ അത്യാധുനിക സാങ്കേതിക വിദ്യകളുടെ മികവോടെയാണ് പരിശീലനം. ബ്രിട്ടന് ഉള്പ്പെടെയും വിവിധ സേനാവിഭാഗങ്ങള് നേരത്തേതന്നെ സുരക്ഷക്കായി പങ്കാളിത്തം പ്രഖ്യാപിച്ചിരുന്നു.