500 കോടിയില് മണിരത്നത്തിന്റെ പൊന്നിയിന് ശെല്വന്,
ബാഹുബലി, ആര്.ആര്.ആര്, കെ.ജി.എഫ് എന്നീ തെന്നിന്ത്യന് ബ്രഹ്മാണ്ഡ ചിത്രങ്ങള് സൃഷ്ടിച്ച ചരിത്രവിജയത്തിന് പിന്നാലെ മലയാളത്തിനും ബോളിവുഡിനും ഭീഷണിയായി മണിരത്നത്തിന്റെ പൊന്നിയിന് ശെല്വനും വിജയ് ദേവരകൊണ്ടയുടെ ലൈഗറും എത്തുന്നു. ലൈഗര് ആഗസ്റ്റ് 25നും പൊന്നിയിന് ശെല്വന് സെപ്തംബര് 30നും ലോക വ്യാപകമായി റിലീസ് ചെയ്യും. സെപ്തംബര് 30ന് സുരേഷ് ഗോപിയുടെ മേ ഹും മൂസയും നിവിന് പോളിയുടെ സാറ്റര്ഡേ നൈറ്റും റിലീസ് ചെയ്യുന്നുണ്ട്.
വിജയ് ദേവരകൊണ്ടയുടെ ആദ്യ പാന് ഇന്ത്യന് ചിത്രമായ ലൈഗര് അഞ്ചു ഭാഷകളില് എത്തുന്നുണ്ട്. അനന്യ പാണ്ഡെയാണ് നായിക. അനന്യയുടെ തെലുങ്ക് അരങ്ങേറ്റ ചിത്രം കൂടിയാണ്. പുരി ജഗന്നാഥ് സംവിധാനം ചെയ്യുന്ന ചിത്രത്തെ സ്റ്റൈലിഷ് മാസ് സിനിമ എന്നാണ് വിശേഷിപ്പിക്കുന്നത്. രമ്യ കൃഷ്ണന്, റോണിത് റോയ്, വിഷ്ണു റെഡ്ഡി, ആലി, മകരന്ദ് ദേശ് പാണ്ഡെ എന്നിവരാണ് മറ്റു താരങ്ങള്. ബോളിവുഡ് സംവിധായകനും നിര്മ്മാതാവുമായ കരണ് ജോഹറിനൊപ്പം പുരി ജഗന്നാഥും നടി ചാര്മി കൗറും അപൂര്വ മെഹ്തയും ചേര്ന്നാണ് നിര്മ്മാണം.
മണിരത്നത്തിന്റെ സ്വപ്നചിത്രമായ പൊന്നിയിന് സെല്വന് കല്കി കൃഷ്ണമൂര്ത്തിയുടെ ഇതേ പേരിലുള്ള തമിഴ് നോവലിനെ ആധാരമാക്കിയാണ് ഒരുങ്ങുന്നത്. വിക്രം, ജയംരവി, കാര്ത്തി, ഐശ്വര്യ റായ്, തൃഷ്ണ, ഐശ്വര്യ ലക്ഷ്മ്മി, ശോഭിത ധുലിപാല, പ്രഭു, ലാല്, പാര്ത്ഥിപന്, അമല പോള്, കീര്ത്തി സുരേഷ്, റാഷി ഖന്ന, സത്യരാജ്, ശരത്കുമാര്, ജയറാം, റഹ്മാന്, പ്രകാശ് രാജ് ഉള്പ്പെടെ വന് താരനിര അണിനിരക്കുന്നുണ്ട്.
ജയം രവി ആണ് പൊന്നിയിന് സെല്വന്. സംഗീതം: എ.ആര്. റഹ്മാനും ഛായാഗ്രഹണം രവിവര്മനുമാണ്. മണിരത്നവും ലൈക പ്രൊഡക്ഷന്സും ചേര്ന്നാണ് നിര്മ്മാണം.