ഡല്‍ഹി : ബലാത്സംഗക്കേസില്‍ ശിക്ഷിക്കപ്പെട്ട് ജയിലില്‍ കഴിയുകയായിരുന്ന വിവാദ ആള്‍‌ദൈവം ഗുര്‍മീത് റാം റഹീം സിങ് ഈയിടെയാണ് പരോളിലിറങ്ങിയത്.
40 ദിവസത്തെ പരോള്‍ റാമും അനുയായികളും ചേര്‍ന്ന് കാര്യമായി തന്നെ ആഘോഷിക്കുകയാണ്. ഇതിനിടെ വാള്‍ കൊണ്ടു കേക്ക് മുറിക്കുന്ന സിങിന്‍റെ ആഘോഷത്തിന്‍റെ വീഡിയോ വൈറലാവുകയും വിവാദങ്ങളില്‍ ഇടംപിടിക്കുകയും ചെയ്തു. ഇപ്പോള്‍ ഇതിനെതിരെ രംഗത്തെത്തിയിരിക്കുകയാണ് ഡല്‍ഹി വനിതാ കമ്മീഷന്‍ അധ്യക്ഷ സ്വാതി മാലിവാള്‍.
ഇത്തരം പ്രവൃത്തികള്‍ക്ക് ആയുധ നിയമപ്രകാരം കേസെടുക്കണമെന്ന് സ്വാതി ട്വീറ്റ് ചെയ്തു. ഗുര്‍മീത് കേക്ക് മുറിക്കുന്ന വീഡിയോ പങ്കുവച്ചുകൊണ്ടാണ് സ്വാതിയുടെ ട്വീറ്റ്. ആയുധങ്ങള്‍ പരസ്യമായി പ്രദര്‍ശിപ്പിക്കുന്നത് ആയുധ നിയമപ്രകാരം നിരോധിച്ചിട്ടുണ്ട്. “ഖട്ടര്‍ജീ, സമൂഹത്തില്‍ നിങ്ങള്‍ തുറന്ന് വിട്ട ബലാത്സംഗി എങ്ങനെയാണ് വ്യവസ്ഥിതിയെ തല്ലുന്നതെന്ന് നോക്കൂ.ഒരു കാലത്ത് മഹരഥന്‍മാരെ ദുര്‍ബലരെ സംരക്ഷിക്കാനാണ് ഉപയോഗിച്ചത്. ഇന്നത് ബലാത്സംഗികള്‍ ഇത്തരം ആഘോഷങ്ങള്‍ക്ക് ഉപയോഗിക്കുന്നു. അത്തരം പ്രവൃത്തികള്‍ക്ക് ആയുധ നിയമപ്രകാരം കേസ് രജിസ്റ്റര്‍ ചെയ്തിട്ടുണ്ട്, എന്നാല്‍ ഇവിടെ മുഴുവന്‍ സര്‍ക്കാരും അയാളുടെ പാദങ്ങളില്‍ കിടക്കുകയാണ്” സ്വാതി ട്വിറ്ററില്‍ കുറിച്ചു.
खट्टर जी, देखिए जिस रेपिस्ट को आपने समाज में खुला छोड़ दिया वो कैसे सिस्टम के गाल पर तमाचा मार रहा है। तलवार से कभी महान वीर कमज़ोरों की रक्षा करते थे, आज तलवार से ये रेपिस्ट जश्न माना रहा है। ऐसे काम पर Arms Act में केस दर्ज होता है लेकिन यहाँ तो पूरी सरकार चरणों में पड़ी है। pic.twitter.com/tJpq1HnCna
— Swati Maliwal (@SwatiJaiHind) January 24, 2023
ബലാത്സംഗം,കൊലപാതകം തുടങ്ങിയ കേസുകളില്‍ ശിക്ഷിക്കപ്പെട്ട് 20 വര്‍ഷത്തെ തടവ് ശിക്ഷ അനുഭവിക്കുന്ന ദേരാ സച്ചാ സൗദ തലവന്‍ ശനിയാഴ്ചയാണ് ഹരിയാനയിലെ റോഹ്തക് ജില്ലയിലെ സുനാരിയ ജയിലില്‍ നിന്ന് പുറത്തിറങ്ങിയത്. തുടര്‍ന്ന് യുപിയിലെ ബാഗ്പത്തിലെ ബര്‍ണാവ ആശ്രമത്തില്‍ എത്തി.ജനുവരി 25ന് ദേര മുന്‍ മേധാവി ഷാ സത്‌നാം സിങ്ങിന്റെ ജന്മദിനത്തോടനുബന്ധിച്ച്‌ സംഘടിപ്പിക്കുന്ന പരിപാടിയില്‍ പങ്കെടുക്കണമെന്ന് റാം റഹീം ജാമ്യാപേക്ഷയില്‍ പറഞ്ഞിരുന്നു.
സോഷ്യല്‍ മീഡിയയില്‍ വൈറലായ വീഡിയോയില്‍, “അഞ്ച് വര്‍ഷത്തിന് ശേഷം ഇത്തരത്തില്‍ ആഘോഷിക്കാന്‍ ഒരു അവസരം ലഭിച്ചു, അതിനാല്‍ കുറഞ്ഞത് അഞ്ച് കേക്കെങ്കിലും മുറിക്കണം, ഇതാണ് ആദ്യത്തെ കേക്ക്” എന്ന് ദേര മേധാവി പറയുന്നത് കേള്‍ക്കാം. തിങ്കളാഴ്ച ഗുര്‍മീത് നടത്തിയ ഓണ്‍ലൈന്‍ സത്സംഗത്തില്‍ ബി.ജെ.പി നേതാക്കള്‍ പങ്കെടുത്തത് വിവാദമായിരുന്നു.
