മനാമ:ഇന്ത്യൻ സ്‌കൂള്‍ ജൂനിയർ വിഭാഗം അവാർഡ് ദാന ചടങ്ങില്‍ കഴിഞ്ഞ അധ്യയന വർഷത്തില്‍ മികവ് പുലർത്തിയ 500 ലധികം വിദ്യാർത്ഥികളെ സർട്ടിഫിക്കറ്റ് നല്‍കി ആദരിച്ചു.
ജഷന്മാള്‍ ഓഡിറ്റോറിയത്തില്‍ നടന്ന ചടങ്ങില്‍ അമാദ് ഗ്രൂപ്പ് ഓഫ് കമ്ബനീസ് സ്ഥാപകനും മാനേജിങ് ഡയറക്ടറുമായ പമ്ബാവാസൻ നായർ മുഖ്യാതിഥിയായിരുന്നു. ഇന്ത്യൻ സ്‌കൂള്‍ ചെയർമാൻ അഡ്വ. ബിനു മണ്ണില്‍ വറുഗീസ്, സെക്രട്ടറി വി രാജപാണ്ഡ്യൻ, വൈസ് ചെയർമാൻ ഡോ. മുഹമ്മദ് ഫൈസല്‍, അസി. സെക്രട്ടറി-ഭരണ സമിതി അംഗം (അക്കാദമിക്‌സ് ) രഞ്ജിനി മോഹൻ, ഭരണ സമിതി അംഗം ബിജു ജോർജ്, പ്രിൻസിപ്പല്‍ വി.ആർ പളനിസ്വാമി, ജൂനിയർ വിങ് പ്രിൻസിപ്പല്‍ പമേല സേവ്യർ, സ്റ്റാഫ് പ്രതിനിധി പാർവതി ദേവദാസ്, വൈസ് പ്രിൻസിപ്പല്‍മാർ എന്നിവർ ചടങ്ങില്‍ പങ്കെടുത്തു. കഴിഞ്ഞ അധ്യയന വർഷത്തില്‍ അക്കാദമിക് രംഗത്ത് മികവ് പുലർത്തിയ രണ്ടും മൂന്നും ക്ലാസുകളിലെ വിദ്യാർത്ഥികള്‍ക്ക് മറ്റ് വിശിഷ്ട വ്യക്തികള്‍ക്കൊപ്പം പമ്ബവാസൻ നായർ മെരിറ്റ് സർട്ടിഫിക്കറ്റ് സമ്മാനിച്ചു.
അനേകം വിദ്യാർത്ഥികള്‍ക്ക് പഠന രംഗത്ത് മികവ് കൈവരിക്കുന്നതിന് വഴിയൊരുക്കിയ അദ്ധ്യാപകരെയും രക്ഷിതാക്കളെയും അവർ അഭിനന്ദിച്ചു. ഇന്ത്യൻ സ്‌കൂളിന്റെ മുൻ രക്ഷിതാവ് കൂടിയായ പമ്ബാവാസൻ നായർ ദീപം തെളിയിച്ചു. സ്‌കൂളിന്റെ അചഞ്ചലമായ പ്രതിബദ്ധതയുടെ തെളിവാണ് വിദ്യാർത്ഥികളുടെ നേട്ടമെന്ന് അധ്യക്ഷ പ്രസംഗത്തില്‍ സ്‌കൂള്‍ ചെയർമാൻ അഡ്വ.ബിനു മണ്ണില്‍ വറുഗീസ് പറഞ്ഞു. ദേശീയ ഗാനം, സ്‌കൂള്‍ ഗാനം, വിശുദ്ധ ഖുർആൻ പാരായണം എന്നിവയോടെയാണ് പരിപാടി ആരംഭിച്ചത്. പമേല സേവ്യർ സ്വാഗതവും സെക്രട്ടറി വി രാജപാണ്ഡ്യൻ നന്ദിയും പറഞ്ഞു.
കൊച്ചുകുട്ടികള്‍ അവതരിപ്പിച്ച ചടുലമായ നൃത്തവും പാട്ടുകളും കാണികളെ ആകർഷിച്ചു. ടൂട്ടി ഫ്രൂട്ടി ഡിലൈറ്റ് എന്ന സംഗീത ശില്‍പ്പവും കർഷകർക്ക് സമർപ്പിതമായ നൃത്താഞ്ജലിയും അറബി നൃത്തവും ദൃശ്യചാരുത പകർന്നു. സ്‌കൂള്‍ ചെയർമാൻ അഡ്വ. ബിനു മണ്ണില്‍ വറുഗീസ്, സെക്രട്ടറി വി.രാജപാണ്ഡ്യൻ, ഭരണ സമിതി അംഗങ്ങള്‍, പ്രിൻസിപ്പല്‍മാരായ വി.ആർ പളനിസ്വാമി, പമേല സേവ്യർ എന്നിവർ കുട്ടികളുടെ അക്കാദമിക രംഗത്തെ മികവിനെയും റിഫ ടീമിന്റെ നേതൃപാടവത്തെയും അഭിനന്ദിച്ചു.
