പെരിന്തല്മണ്ണ: കോവിഡ് മഹാമാരിയെക്കുറിച്ച് ഗവേഷണ പ്രബന്ധങ്ങള് തയാറാക്കിയ ഗവേഷകനെത്തേടി ലോകാരോഗ്യ സംഘടനയുടെ അംഗീകാരം.
പെരിന്തല്മണ്ണ മൗലാന കോളജ് ഓഫ് ഫാര്മസി വൈസ് പ്രിന്സിപ്പല് ഡോ. പി.പി. നസീഫ് കഴിഞ്ഞ വര്ഷം തയാറാക്കിയ ഒമ്ബത് പ്രബന്ധങ്ങള് അന്താരാഷ്ട്ര ജേണലുകളില് പ്രസിദ്ധീകരിച്ച് ശ്രദ്ധനേടിയതില് കോവിഡ് പഠനവുമായി ബന്ധപ്പെട്ട രണ്ട് പ്രബന്ധങ്ങള് ഡബ്ല്യു.എച്ച്.ഒ അവരുടെ ഔദ്യോഗിക വെബ്സൈറ്റില് പ്രസിദ്ധപ്പെടുത്തി. കോവിഡിന്റെ നൂതന ചികിത്സരംഗത്ത് ‘ഫെര്ട്ടിന്’ മൂലകത്തിന്റെ അനന്തസാധ്യതകള് എന്നതായിരുന്നു ഗവേഷണ പ്രബന്ധത്തിലെ വിഷയം. സൗദി ജേണല് ഓഫ് ബയോളജിക്കല് സയന്സ്, ആനിമല്സ്, സപറേഷന്സ്, ഫാര്മസ്യൂട്ടിക്ക്, കോമ്ബിറ്റോറിയല് കെമിസ്ട്രി, സോഷ്യല് സയന്സ്, ഫാര്മസ്യൂട്ടിക്കല് സയന്സ് തുടങ്ങിയ അന്താരാഷ്ട്ര ജേണലുകളിലാണ് മറ്റു പ്രബന്ധങ്ങള് പ്രസിദ്ധീകരിച്ചത്.
ഡോ. പി.പി. നസീഫ് ഇതുവരെ 23 പ്രബന്ധങ്ങളാണ് പ്രസിദ്ധീകരിച്ചിട്ടുള്ളത്. 2021ല് പ്രസിദ്ധീകരിച്ച ഗവേഷണ പ്രബന്ധങ്ങളുടെ ആകെ ഇംപാക്ട് ഫാക്ടര് 29 ആണ്. കന്നുകാലികളില് ചൂട് പ്രതിരോധിക്കുന്ന ജീന് കണ്ടെത്തിയ വാര്ത്ത അടുത്തിടെ ലോകശ്രദ്ധ നേടിയിരുന്നു. അതിന്റെ മലയാളി ശാസത്രജ്ഞരുടെ നേതൃത്വത്തിലുള്ള ഗവേഷക സംഘത്തിലും ഡോ. പി.പി. നസീഫ് ഉണ്ടായിരുന്നു. ഉദരംപൊയില് സ്വദേശി പി.പി. അലവിക്കുട്ടി മാസ്റ്ററുടെയും പരേതയായ ബംഗാളത്ത് നഫീസയുടെയും മകനാണ്. ഭാര്യ: ഡോ. കെ. റഫീദ. മക്കള്: പി.പി. അന്സഫ് അസലി, പി.പി. അസ്ഫ അസലി, പി.പി. അമന് അസലി.