ജിദ്ദ: ‘ദര്ബ് സുബൈദ’ എന്ന പേരില് അറിയപ്പെടുന്ന പൗരാണിക അറബ് വാണിജ്യ പാതയിലൂടെയുള്ള കൂട്ടമായ യാത്ര (ഖാഫില)യുടെ രണ്ടാം പതിപ്പിന് വ്യാഴാഴ്ച സൗദിയില് തുടക്കമാവും.
വിവിധ സംഘങ്ങളായി (ഖാഫിലകള്) നടത്തുന്ന യാത്രയുടെ ഒരുക്കം നേരത്തേ പൂര്ത്തിയായി. ഹൈക്കിങ്, കുതിര, ഒട്ടകം, പാരാഗ്ലൈഡിങ്, സൈക്കിള്, മോട്ടോര് സൈക്കിള് എന്നിവ ഉപയോഗിച്ചുള്ള യാത്രയില് 164ലധികം പേര് പങ്കെടുക്കും. കൂടാതെ സര്ക്കാര്, സ്വകാര്യ മേഖലയിലെ നിരവധി പേരും ഖാഫിലയില് അണിചേരും. ഹാഇലിന് 230 കിലോമീറ്റര് വടക്ക് ‘ഇമാം തുര്ക്കി ബിന് അബ്ദുല്ല റോയല് റിസര്വ്’ എന്ന സംരക്ഷിത വന്യമരുഭൂ പ്രദേശത്തെ ‘മദീനത്തു തുര്ബ’യില് നിന്നാണ് യാത്ര ആരംഭിക്കുക. 13 ദിവസം നീണ്ടുനില്ക്കുന്ന ഖാഫില ‘ദര്ബ് സുബൈദ’ (സുബൈദ പാത) എന്ന പൗരാണിക പാതയിലൂടെ 360 കിലോമീറ്റര് സഞ്ചരിച്ച് മര്കസ് അല് ബആഇസിലെത്തും. ദര്ബ് സുബൈദ ഖാഫില രണ്ടാം പതിപ്പിലൂടെ ലോകെത്ത ഏറ്റവും പ്രധാനപ്പെട്ട പുരാതന യാത്ര പാതകളിലൊന്ന് പുനരുജ്ജീവിപ്പിക്കുക, പാത കടന്നുപോകുന്ന പ്രദേശങ്ങള് വികസിപ്പിക്കുക എന്നിവയാണ് ലക്ഷ്യമിടുന്നതെന്ന് ഖാഫില ജനറല് സൂപ്പര്വൈസര് ഡോ. അബ്ദുല് അസീസ് ഉബൈദാഅ് പറഞ്ഞു.
യാത്രക്കിടെ പാതയില് മരങ്ങള് നട്ടുപിടിപ്പിച്ച് ഹരിത സൗദി പദ്ധതിയെ പിന്തുണക്കും.
സുബൈദ പാത കടന്നുപോകുന്ന ഗ്രാമങ്ങളിലെയും നഗരങ്ങളിലെയും ആളുകള്ക്ക് ഖാഫിലയുടെ ലക്ഷ്യം പരിചയപ്പെടുത്തുകയും യാത്രക്കും മറ്റ് അനുബന്ധ ലക്ഷ്യപൂര്ത്തീകരണത്തിനുള്ള പരിശീലനം നല്കുകയും ചെയ്യുമെന്നും ജനറല് സൂപ്പര്വൈസര് പറഞ്ഞു.