മറ്റത്തൂര്‍: മലയോരത്തെ ആദ്യ വിദ്യാലയമായ മറ്റത്തൂര്‍ സര്‍ക്കാര്‍ പ്രാഥമിക വിദ്യാലയത്തിന് ശതാബ്ദി സമ്മാനമായി ലഭിച്ച ‘കിളിക്കൂടി’ന്‍റെ സമര്‍പ്പണം ഉത്സവാന്തരീക്ഷത്തില്‍ നടന്നു.
സമഗ്ര ശിക്ഷ കേരള അനുവദിച്ച 15 ലക്ഷം രൂപ വിനിയോഗിച്ച്‌ ജില്ലയില്‍ ആദ്യമായി സജ്ജീകരിച്ച മാതൃകാ പ്രീപ്രൈമറി പദ്ധതിയാണ് കിളിക്കൂട്.
കുട്ടികളുടെ മാനസികവും ശാരീരികവുമായ വളര്‍ച്ചക്ക് ഉതകുന്ന രീതിയിലുള്ള നിരവധി വര്‍ണവിസ്മയങ്ങളും മനോഹരമായ പാര്‍ക്കുമാണ് പദ്ധതിയുടെ ഭാഗമായി വിദ്യാലയത്തില്‍ ഒരുക്കിയിട്ടുള്ളത്. വായനമൂല, നിര്‍മാണ മൂല, സംഗീത മൂല, അഭിനയ മൂല തുടങ്ങി പ്രത്യേക ഇടങ്ങളും ഇവിടെ സജ്ജമാക്കിയിട്ടുണ്ട്. ശില്‍പങ്ങളും മുളങ്കുടിലും കേരളീയ കലകളുടെ ചിത്രങ്ങള്‍ ആലേഖനം ചെയ്ത വര്‍ണച്ചുമരുകളും കളിയുപകരണങ്ങളും കിളിക്കൂട് പദ്ധതിയിലുണ്ട്. വിദ്യാലയാങ്കണത്തില്‍ സജ്ജമാക്കിയ ഉദ്യാനത്തില്‍ ദിനോസര്‍, ഹെലികോപ്റ്റര്‍, ട്രെയിന്‍ എന്നിവയുടെ മാതൃകകളും സ്ലൈഡറുകളും നിര്‍മിച്ചിട്ടുണ്ട്.
വിദ്യാഭ്യാസ മന്ത്രി വി. ശിവന്‍കുട്ടി കിളിക്കൂട് പദ്ധതിയുടെ ഉദ്ഘാടനം ഓണ്‍ലൈനില്‍ നിര്‍വഹിച്ചു. കെ.കെ. രാമചന്ദ്രന്‍ എം.എല്‍.എ അധ്യക്ഷത വഹിച്ചു. ശിലാഫലകം അനാഛാദനം എം.എല്‍.എയും മാതൃകാ പ്രീപ്രൈമറിയുടെ ഭാഗമായി സജ്ജീകരിച്ച നിര്‍മാണ മൂലയുടെ ഉദ്ഘാടനം കൊടകര ബ്ലോക്ക് പഞ്ചായത്ത് പ്രസിഡന്‍റ് എം.ആര്‍. രഞ്ജിത്തും നിര്‍വഹിച്ചു. മറ്റത്തൂര്‍ പഞ്ചായത്ത് പ്രസിഡന്‍റ് അശ്വതി വിബി കളിമൂല ഉദ്ഘാടനം ചെയ്തു.
ജില്ല പഞ്ചായത്തംഗം ജനീഷ് പി. ജോസ്, പഞ്ചായത്ത് വൈസ് പ്രസിഡന്‍റ് കെ.വി. ഉണ്ണികൃഷ്ണന്‍, സ്ഥിരം സമിതി അധ്യക്ഷ ദിവ്യസുധീഷ്, സനല ഉണ്ണികൃഷ്ണന്‍, ബ്ലോക്ക് പഞ്ചായത്തംഗം സജിത രാജീവന്‍, സമഗ്രശിക്ഷ കേരള ജില്ല കോ ഓഡിനേറ്റര്‍ ഡോ. എന്‍.ജെ. ബിനോയ്, എസ്.എസ്.കെ ജില്ല പ്രോഗ്രാം ഓഫിസര്‍ കെ.ബി. ബ്രിജി, ഡയറ്റ് പ്രിന്‍സിപ്പല്‍ ഡോ. ഡി. ശ്രീജ, ഫാക്കല്‍റ്റി ഡോ. പി.സി. സിജി, കൊടകര ബി.പി.സി കെ. നന്ദകുമാര്‍, പ്രധാനാധ്യാപിക സി.പി. ബേബി, ചാലക്കുടി എ.ഇ.ഒ കെ.വി. പ്രദീപ്, പി.ടി.എ പ്രസിഡന്‍റ് ദീപ്തി സന്തോഷ്, മാതൃസംഘം പ്രസിഡന്‍റ് ജെസി ബിജു, ഒ.എസ്.എ പ്രസിഡന്‍റ് സുരേന്ദ്രന്‍ ഞാറ്റുവെട്ടി, ജസ്റ്റിന്‍ മങ്കുഴി എന്നിവര്‍ സംസാരിച്ചു.
