ദോഹ: ആഭ്യന്തര മന്ത്രാലയത്തിന്റെ സേവനങ്ങളെല്ലാം ലഭ്യമാക്കുന്ന ഏകജാലക സംവിധാനമായ ‘മെട്രാഷ് രണ്ട്’ ആപ്ലിക്കേഷന് വഴി കഴിഞ്ഞ വര്ഷം 60 ലക്ഷത്തിലേറെ ഇടപാടുകള് നടന്നതായി ആഭ്യന്തര മന്ത്രാലയം.
നിലവില് 20 ലക്ഷം ആക്ടിവ് ഉപഭോക്താക്കളാണ് മെട്രാഷിനുള്ളത്. ഏതുസമയവും ഉപയോഗപ്പെടുത്താവുന്ന വിധത്തില് 250 സേവനങ്ങള് മെട്രാഷില് ലഭ്യമാണെന്ന് ആഭ്യന്തര മന്ത്രാലയം വ്യക്തമാക്കി.
റെസിഡന്ഷ്യല് റിന്യൂവല്, വിസ എക്സ്റ്റന്ഷന്, വെഹിക്കിള് ഓണര്ഷിപ്, വാഹന രജിസ്ട്രേഷന് പുതുക്കല്, ദേശീയ മേല്വിലാസ സേവനം, ഗതാഗത നിയമലംഘനത്തിന് പിഴയടക്കല് എന്നീ സേവനങ്ങളാണ് കഴിഞ്ഞ വര്ഷം കൂടുതലായി ഉപയോഗപ്പെടുത്തിയതെന്ന് ആഭ്യന്തര മന്ത്രാലയം ഇന്ഫര്മേഷന് സിസ്റ്റംസ് ജനറല് ഡയറക്ടറേറ്റിലെ ഫസ്റ്റ് ലെഫ്. അലി അല് ഈദ്റൂസ് പറഞ്ഞു. ആഭ്യന്തര മന്ത്രാലയത്തിലെ ഇ-സേവനങ്ങള് എന്ന വിഷയത്തില് മന്ത്രാലയം സംഘടിപ്പിച്ച വെബിനാറില് സംസാരിക്കുകയായിരുന്നു അദ്ദേഹം. 2020ല് ഏഴ് ദശലക്ഷം ഇടപാടുകളാണ് മെട്രാഷിലൂടെ നടന്നത്. ഓട്ടോമാറ്റിക് റെസിഡന്സി പെര്മിറ്റ് റിന്യൂവല്, പാസ്പോര്ട്ട് ചെയ്ഞ്ച്, റെസിഡന്സി കാന്സലേഷന് തുടങ്ങിയ സേവനങ്ങളും അധികമായി ഉപയോഗിച്ചുവെന്നും അദ്ദേഹം വ്യക്തമാക്കി. മെട്രാഷിലെ സേവനങ്ങള്, സര്വിസ് നിബന്ധനകള്, ആക്ടിവേഷന് രീതികള്, സേവന വിഭാഗങ്ങള്, സേവന മെനു, പൊതുസേവനങ്ങള്, പുതുതായി ചേര്ക്കപ്പെട്ട സേവനങ്ങള്, സീറോ ക്ലിക്ക് കണ്സെപ്റ്റ്, ഓട്ടോമാറ്റിക് റെഡിസന്സി റിന്യൂവല്, മെട്രാഷ് രണ്ടിലെ വിവര സുരക്ഷ, സ്മാര്ട്ട് ഡാഷ്ബോര്ഡ് തുടങ്ങിയ വിഷയങ്ങള് വെബിനാറില് വിശദീകരിച്ചു.
ഇന്ഫര്മേഷന് സിസ്റ്റംസ് ജനറല് ഡയറക്ടറേറ്റുമായി സഹകരിച്ച് പബ്ലിക്ക് റിലേഷന്സ് വിഭാഗം സംഘടിപ്പിച്ച പരിപാടിയില് പൊതു, സ്വകാര്യ കമ്ബനികളില്നിന്നുള്ള എച്ച്.ആര്, അഡ്മിന് ഉദ്യോഗസ്ഥര്, പബ്ലിക്ക് റിലേഷന്സ് ഓഫിസര്മാര്, ഗവണ്മെന്റ് റിലേഷന്സ് ഓഫിസര്മാര് ഉള്പ്പെടെ 200ലധികം പേര് പങ്കെടുത്തു.