കായംകുളം: കണ്ണ് മൂടിക്കെട്ടി മുട്ടുവരെ മാത്രമുള്ള വലത് കൈയിലൂടെ കീ ബോര്‍ഡില്‍ വിസ്മയം തീര്‍ത്ത കുഞ്ഞുയാസീന്‍റെ മിന്നല്‍ പ്രകടനത്തില്‍ അത്ഭുത സ്തബ്ധരായി കുരുന്നുകൂട്ടം.
കിറ്റ് ഇംഗ്ലീഷ് മീഡിയം സ്കൂള്‍ കുട്ടികളാണ് വേറിട്ട പ്രവേശനോത്സവത്തിന് സാക്ഷികളായത്. വൈകല്യങ്ങളെ മനക്കരുത്തില്‍ അതിജീവിച്ച യാസീനെ (10) മുഖ്യാതിഥിയാക്കിയതിലൂടെ പ്രവേശനത്തിന്‍റെ ആദ്യദിനത്തില്‍ കുട്ടികള്‍ക്ക് ഇച്ഛാശക്തിയുടെ പാഠം കൂടിയാണ് പകര്‍ന്നുനല്‍കിയത്. പുതുപ്പള്ളി പ്രയാര്‍ വടക്ക് എസ്.എസ് മന്‍സിലില്‍ ഷാനവാസിന്‍റെയും ഷൈലയുടെയും മകനാണ് യാസീന്‍. ഇടത് കൈയും കാലും ഇല്ല, വലത് കൈ മുട്ടുവരെ മാത്രം.
വളഞ്ഞ വലതുകാല്‍ രൂപത്തില്‍ മാത്രം. എന്നാല്‍, ഇതൊന്നും കുറവായി കാണാത്ത യാസീന്‍ സ്റ്റേജില്‍ ആടിത്തിമിര്‍ക്കുന്ന മികച്ചൊരു നര്‍ത്തകന്‍ കൂടിയാണ്. ഇതോടൊപ്പം പാട്ടുകാരനായും മിമിക്രിക്കാരനായും തിളങ്ങുന്നു. മൊബൈല്‍ കാഴ്ചകളിലൂടെയാണ് കഴിവുകള്‍ ഓരോന്നും സ്വായത്തമാക്കിയത്. മകനെയോര്‍ത്ത് സങ്കടപ്പെടാത്ത മാതാപിതാക്കളുടെ ആത്മവിശ്വാസമാണ് യാസീന്‍റെ കഴിവുകളെ ഒന്നായി വികസിപ്പിച്ചത്.
മകന്‍റെ ആഗ്രഹം സാധിക്കാന്‍ നിഴലായി ഷൈല ഒപ്പമുണ്ടാകും. ഉമ്മയുടെ ഒക്കത്ത് ഏറിയാണ് എവിടേക്കുമുള്ള സഞ്ചാരം. പുതുപ്പള്ളി കെ.എന്‍.എം യു.പി.എസിലെ അഞ്ചാം ക്ലാസ് വിദ്യാര്‍ഥിയായി പഠനത്തിലും മിടുക്കനാണ്.
സ്കൂള്‍ ചെയര്‍മാന്‍ ഒ. അബ്ദുല്ലക്കുട്ടി ഉദ്ഘാടനം ചെയ്തു. പി.ടി.എ പ്രസിഡന്‍റ് ഷൗക്കത്ത് പറമ്ബി അധ്യക്ഷത വഹിച്ചു. പ്രിന്‍സിപ്പല്‍ ഡോ. എം.എസ്. സമീം, ട്രസ്റ്റ് ജനറല്‍ സെക്രട്ടറി വി.എ. ഷഹാല്‍, മാനേജര്‍ എച്ച്‌. സിയാദ്, വൈസ് പ്രിന്‍സിപ്പല്‍ എസ്. ഷീബ, സ്റ്റാഫ് സെക്രട്ടറി മധു, പ്രഫ. കെ.എം. അബ്ദുല്ലക്കുട്ടി, എസ്. മുഹ്യിദ്ദീന്‍ ഷാ, യു. ഷൈജു, വൈ. ഇര്‍ഷാദ്, നസീര്‍ ഹമീദ്, അഷ്റഫ് കാവേരി, അഷ്റഫ് ക്വാളിറ്റി തുടങ്ങിയവര്‍ സംസാരിച്ചു.
