ചാരുംമൂട് (ആലപ്പുഴ): പ്രഭാത നടത്തത്തിനിറങ്ങിയവരുടെ ഇടയിലേക്ക് ടോറസ് ലോറി പാഞ്ഞുകയറി മൂന്നു പേര്‍ക്ക് ദാരുണാന്ത്യം.
ഒരാള്‍ക്ക് പരിക്കേറ്റു. മരിച്ചവര്‍ മൂവരും ആത്മസുഹൃത്തുക്കളാണ്. വാഹനം നിര്‍ത്താതെപോയെങ്കിലും ഡ്രൈവര്‍ പിന്നീട് പൊലീസ് സ്റ്റേഷനില്‍ കീഴടങ്ങി. നൂറനാട് എരുമക്കുഴി പത്താംമൈല്‍ വാലുകുറ്റിയില്‍ വി.എം. രാജു (66), എരുമക്കുഴി കമലാമന്ദിരം രാമചന്ദ്രന്‍ നായര്‍ (73), പണയില്‍ താഴമംഗലത്ത് വിക്രമന്‍ നായര്‍ (58) എന്നിവരാണ് മരിച്ചത്. പരിക്കേറ്റ പണയില്‍ സോപാനം രാജശേഖരന്‍ നായര്‍ (65) ചികിത്സയിലാണ്.
വ്യാഴാഴ്ച രാവിലെ 6.15ന് നൂറനാട് പള്ളിമുക്ക്-ആനയടി റോഡില്‍ പണയില്‍ പാലമുക്കിലാണ് അപകടം. വര്‍ഷങ്ങളായി ഒരുമിച്ച്‌ നടക്കാനിറങ്ങുന്ന ഇവര്‍ പതിവുപോലെ വെള്ളച്ചിറ വരെ നടന്നശേഷം തിരികെ വരുമ്ബോഴാണ് അമിതവേഗത്തില്‍ വന്ന ലോറി ഇടിച്ചിട്ടത്. സി.സി.ടി.വി ദൃശ്യങ്ങള്‍ പരിശോധിച്ചാണ് അപകടമുണ്ടാക്കിയ വാഹനം ടോറസാണെന്ന് തിരിച്ചറിഞ്ഞത്. ഡ്രൈവര്‍ പള്ളിക്കല്‍ കലതിവിളയില്‍ അനീഷ് കുമാര്‍ (30) സ്റ്റേഷനില്‍ കീഴടങ്ങി.
പ്രവാസിയായിരുന്ന വി.എം. രാജുവിന്‍റെ സംസ്കാരം പിന്നീട്. ലിസിയാണ് ഭാര്യ. മക്കള്‍: ആനന്ദ്, അമ്ബിളി മരുമക്കള്‍: നിമ്മി, അനു. രാമചന്ദ്രന്‍ നായരുടെ സംസ്കാരം ശനിയാഴ്ച നടക്കും. രാധാദേവിയാണ് ഭാര്യ. റിട്ട. ദേവസ്വം ബോര്‍ഡ് ജീവനക്കാരനായ വിക്രമന്‍ നായരുടെ സംസ്കാരം വെള്ളിയാഴ്ച ഉച്ചക്ക് 12ന് വീട്ടുവളപ്പില്‍. സിന്ധുവാണ് ഭാര്യ. ഐശ്വര്യ, അനഘ എന്നിവര്‍ മക്കളാണ്.
