കോട്ടയം: കാപ്പ ചുമത്തി അതിരമ്ബുഴ സ്വദേശി ബിബിനെ (24) കരുതല്‍ തടങ്കലില്‍ പാര്‍പ്പിച്ചു.
കഴിഞ്ഞ ഏഴ് വര്‍ഷമായി ഏറ്റുമാനൂര്‍, കുറവിലങ്ങാട്, ഗാന്ധിനഗര്‍ പൊലീസ് സ്റ്റേഷന്‍ പരിധികളില്‍പ്പെട്ട കോട്ടമുറി, നീണ്ടൂര്‍, ചാമക്കാല, പട്ടിത്താനം, വില്ലൂന്നി തുടങ്ങിയ സ്ഥലങ്ങളില്‍ സംഘം ചേര്‍ന്ന് അസഭ്യം വിളിക്കുക, ഭീഷണിപ്പെടുത്തുക, തടസ്സംചെയ്ത് ദേഹോപദ്രവമേല്‍പ്പിക്കുക, ആയുധമുപയോഗിച്ച്‌ കഠിന ദേഹോപദ്രവമേല്‍പിക്കുക, സര്‍ക്കാര്‍ ഉദ്യോഗസ്ഥരുടെ ഔദ്യോഗിക കൃത്യനിര്‍വഹണത്തെ തടസ്സപ്പെടുത്തുക, നിയമാനുസൃത തടങ്കലില്‍നിന്നും രക്ഷപ്പെടുക, സംഘം ചേര്‍ന്ന് നരഹത്യാശ്രമം നടത്തുക, കൊലപാതകശ്രമം, വിഷവാതകം സ്‌പ്രേ ചെയ്ത് ദേഹോപദ്രവമേല്‍പ്പിക്കുക, കവര്‍ച്ച തുടങ്ങിയ സാമൂഹ്യവിരുദ്ധ പ്രവൃത്തികളില്‍ സ്ഥിരംപ്രതിയാണ്.
ഏറ്റുമാനൂര്‍ എസ്.എച്ച്‌.ഒയുടെ റിപ്പോര്‍ട്ട് പ്രകാരം കലക്ടറാണ് കരുതല്‍ തടങ്കലിന് ഉത്തരവിട്ടത്. പ്രതിയെ വിയ്യൂര്‍ സെന്‍ട്രല്‍ ജയിലില്‍ ഹാജരാക്കി.
