ദുബൈ: കോവിഡ് അതിജീവനത്തിനായി 2020-21 കാലത്ത് രൂപപ്പെടുത്തിയ റിക്കവറി പ്ലാന് പൂര്ണ വിജയമെന്ന് യു.എ.ഇയുടെ മന്ത്രിസഭയുടെ അവലോകനം.
യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന് റാശിദ് ആല് മക്തൂമിന്റെ അധ്യക്ഷതയില് ചേര്ന്ന യോഗമാണ് പദ്ധതി അവലോകനം നടത്തിയത്. ഫെഡറല്, പ്രാദേശിക സ്ഥാപനങ്ങളുടെ പങ്കാളിത്തത്തോടെ 33 സംരംഭങ്ങള് വികസിപ്പിക്കുകയും നടപ്പിലാക്കുകയും ചെയ്ത പദ്ധതി നൂറുശതമാനം വിജയിച്ചതായി യോഗം വിലയിരുത്തി. സമ്ബദ് വ്യവസ്ഥയെ ശാക്തീകരിക്കുകയും പുതു വിപണികളിലേക്ക് പ്രവേശനം നേടുകയും ചെയ്യുക എന്ന ലക്ഷ്യങ്ങളോടെയാണ് പദ്ധതി പ്രഖ്യാപിച്ചിരുന്നത്.
കോവിഡ് ഭീതിക്കിടയിലും 2021ല് മൊത്ത ആഭ്യന്തര ഉല്പാദനം(ജി.ഡി.പി) 3.8ശതമാനമായി നിലനിര്ത്താന് പദ്ധതിയിലൂടെ സാധിച്ചു. അന്താരാഷ്ട്ര സ്ഥാപനങ്ങള് പ്രവചിച്ച കണക്കുകളേക്കാള് 1.7 ശതമാനം കൂടുതയാണിത്. എണ്ണ ഇതര ജി.ഡി.പി അതേ വര്ഷം 5.3 ശതമാനത്തിലെത്തിയതും വലിയ മുന്നേറ്റമാണ്. രാജ്യത്തെ എണ്ണ ഇതര കയറ്റുമതിയും 47 ശതമാനം വര്ധിച്ചു. നേരിട്ടുള്ള വിദേശ നിക്ഷേപത്തിന്റെ ഒഴുക്ക് 16 ശതമാനം ഈ കാലയളവില് വര്ധിച്ചിട്ടുണ്ട്. പുതിയ രജിസ്റ്റര് ചെയ്ത കമ്ബനികളുടെ എണ്ണം 126 ശതമാനം കൂടിയെന്നും റിപ്പോറട്ട് ചൂണ്ടിക്കാട്ടുന്നു.
സാമ്ബത്തിക മുന്നേറ്റത്തിന്റെ പുതിയ മേഖലകളിലേക്ക് പ്രവേശിക്കുന്നതിന് നികുതി ചട്ടങ്ങളില് നിരവധി ഭേദഗതികള്ക്ക് മന്ത്രിസഭ അംഗീകാരം നല്കിയിട്ടുണ്ട്. ബിസിനസ്, നിക്ഷേപ അന്തരീക്ഷം ഊഷ്മളമാക്കാന് ലക്ഷ്യമിട്ടുള്ള നടപടിയാണിത്. കോര്പറേറ്റ് നികുതി നിയമവുമായി ഏകോപനവും സൃഷ്ടിക്കുക എന്ന ലക്ഷ്യത്തോടെ നികുതി നടപടിക്രമങ്ങളിലെ ഫെഡറല് നിയമ ഭേദഗതിക്കും മന്ത്രിസഭ അംഗീകാരം നല്കിയിട്ടുണ്ട്. അബൂദബി ഖസ്ര് അല് വതനിലാണ് മന്ത്രിസഭാ യോഗം നടന്നത്.
2022ന്റെ ആദ്യ പാദത്തില് ലോകത്ത് തന്നെ ഏറ്റവും കൂടുതല് ടൂറിസ്റ്റുകളെ ആകര്ഷിക്കാന് യു.എ.ഇക്ക് സാധിച്ചതായി നേരത്തെ കണക്കുകള് പുറത്തു വന്നിരുന്നു. ഹോട്ടല് ഒക്യുപെന്സി ഈ സമയത്ത് 82ശതമാനമായിരുന്നു. കോവിഡിനെ ഏറ്റവും ആസൂത്രിതമായ രീതിയില് പ്രതിരോധിക്കാനും വാക്സിനേഷന് വേഗത്തില് പൂര്ത്തീകരിക്കാനും സാധിച്ചതാണ് യു.എ.ഇക്ക് യാത്ര മേഖലയില് മുന്നേറ്റത്തിന് സാധിച്ച ഘടകം. യു.എ.ഇയിലെ ആരോഗ്യ സുരക്ഷാ സംവിധാനങ്ങളെ കുറിച്ച വിശ്വാസം ലോകതലത്തില് വര്ധിക്കാന് ഇക്കാലത്തെ നടപടികള് കാരണമായി. എക്സ്പോ 2020 ദുബൈ പോലുള്ള അന്താരാഷ്ട്ര തലത്തില് ശ്രദ്ധിക്കപ്പെട്ട പരിപാടികളും വിനോദ സഞ്ചാരികളുടെ ഒഴുക്കിന് സഹായിച്ചു.
സുരക്ഷതത്വവും യു.എ.ഇയിലേക്ക് സഞ്ചാരികളെ ആകര്ഷിക്കുന്ന സുപ്രധാന ഘടകമാണ്. കോവിഡ് ഭീതി ഒഴിഞ്ഞ സാഹചര്യത്തില് വിവിധ രാജ്യങ്ങളില് നിന്ന് വരും മാസങ്ങളിലും കൂടുതല് സഞ്ചാരികളെത്തുമെന്നാണ് വിലയിരുത്തപ്പെടുന്നത്.