കട്ടപ്പന: നഗരസഭയുടെ പുതിയ അധ്യക്ഷയായി കോണ്ഗ്രസിലെ ഷൈനി സണ്ണി എതിരില്ലാതെ തെരഞ്ഞെടുക്കപ്പെട്ടു.
മുന്നണി ധാരണപ്രകാരം ബീന ജോബി രാജിവെച്ചതിനെ തുടര്ന്നാണ് തെരഞ്ഞെടുപ്പ്. അതേസമയം, എല്.ഡി.എഫ് തെരഞ്ഞെടുപ്പ് ബഹിഷ്കരിച്ച് ഇറങ്ങിപ്പോയി. ബി.ജെ.പി അംഗങ്ങള് നിഷ്പക്ഷ നിലപാട് സ്വീകരിച്ചു.
യു.ഡി.എഫ് അധികാരത്തില് വന്നതിനെ തുടര്ന്ന് ഐ വിഭാഗത്തിന് ആദ്യ മൂന്ന് വര്ഷത്തേക്കാണ് ചെയര്പേഴ്സന് സ്ഥാനം നല്കിയത്. ആദ്യ ഒന്നര വര്ഷം ബീന ജോബി കാലാവധി പൂര്ത്തിയാക്കി. ഇനിയുള്ള ഒന്നര വര്ഷം ഷൈനി സണ്ണിയും തുടര്ന്നുള്ള രണ്ട് വര്ഷം എ ഗ്രൂപ്പിലെ ബീന ടോമിയും നഗരസഭയെ നയിക്കും. മുന് അധ്യക്ഷയും ഭരണകക്ഷി അംഗങ്ങളും തമ്മില് അഭിപ്രായ ഭിന്നതയുണ്ടെന്ന പ്രചാരണം അടിസ്ഥാനരഹിതമാണെന്ന് ഷൈനി സണ്ണി പറഞ്ഞു.
ഭരണത്തലവന്മാര് മാറി വരുന്നതല്ലാതെ വികസന പ്രവര്ത്തനങ്ങള് നടക്കുന്നില്ലെന്ന് ആരോപിച്ചാണ് എല്.ഡി.എഫ് അംഗങ്ങള് തെരഞ്ഞെടുപ്പ് ബഹിഷ്കരിച്ചത്. ഒരു സ്വതന്ത്ര ഉള്പ്പെടെ 23 അംഗങ്ങളാണ് യു.ഡി.എഫിനുള്ളത്. എല്.ഡി.എഫ് ഒമ്ബത്, ബി.ജെ.പി രണ്ട് എന്നിങ്ങനെയാണ് നഗരസഭയിലെ കക്ഷിനില.