കുമ്ബള: കായിക സാമഗ്രികള്‍ വാങ്ങാനെത്തിയ പെണ്‍കുട്ടിയുടെ ദൃശ്യങ്ങള്‍ ഒളികാമറയില്‍ പകര്‍ത്താന്‍ ശ്രമിച്ച കേസില്‍ കടയിലെ ജീവനക്കാരനെ കുമ്ബള പൊലീസ് അറസ്റ്റ് ചെയ്തു.
ബന്തിയോട് സംസം മന്‍സിലില്‍ മുഹമ്മദ് അഷ്റഫ് എന്ന ആസിഫിനെയാണ് (28) കുമ്ബള എസ്.ഐ വി.കെ. അനീഷ് കുമാറിന്റെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി. കഴിഞ്ഞദിവസം ബന്തിയോട്ടെ കടയിലായിരുന്നു കേസിനാസ്പദമായ സംഭവം.
അമ്മാവനോടൊപ്പം കടയില്‍ എത്തിയതായിരുന്നു പെണ്‍കുട്ടി. വസ്ത്രം മാറുന്നതിനായി പ്രത്യേക സൗകര്യമില്ലാതിരുന്ന കടയില്‍ ജീവനക്കാരന്‍ കാണിച്ചുകൊടുത്ത സ്റ്റോര്‍ റൂമിലേക്കു പെണ്‍കുട്ടി ജഴ്സി ഇട്ടുനോക്കാന്‍ ചെന്നപ്പോഴാണ് സമീപത്ത് കാമറ ഓണ്‍ ചെയ്തുവെച്ച മൊബൈല്‍ ഫോണ്‍ കണ്ടെത്തിയത്. പെണ്‍കുട്ടി ഫോണുമായി മാതൃസഹോദരന്റെ അടുത്തെത്തി വിവരങ്ങള്‍ പറഞ്ഞു. തുടര്‍ന്നു കുമ്ബള പൊലീസില്‍ പരാതി നല്‍കുകയായിരുന്നു.
