ജിദ്ദ: സുഡാനിലുണ്ടായ വെള്ളപ്പൊക്കത്തിലും പേമാരിയിലും ദുരിതമനുഭവിക്കുന്നവര്‍ക്ക് സഹായമെത്തിക്കാന്‍ സൗദി ഭരണാധികാരി സല്‍മാന്‍ രാജാവ് നിര്‍ദേശം നല്‍കി.
ഭക്ഷണവും പാര്‍പ്പിടസഹായവും ഉള്‍പ്പെടുന്ന അടിയന്തരസഹായം കിങ് സല്‍മാന്‍ റിലീഫ് സെന്‍റര്‍ (കെ.എസ് റിലീഫ്) വഴി എത്തിക്കാനാണ് നിര്‍ദേശം.
ദുരിതബാധിതര്‍ക്ക് സൗദി ഭരണകൂടം നല്‍കിക്കൊണ്ടിരിക്കുന്ന മാനുഷികസഹായം വിപുലീകരിക്കുന്നതിന്റെ ഭാഗമാണ് പുതിയ നിര്‍ദേശമെന്ന് കിങ് സല്‍മാന്‍ സെന്‍റര്‍ ഫോര്‍ റിലീഫ് ആന്‍ഡ് ഹ്യുമാനിറ്റേറിയന്‍ ആക്ഷന്‍ ജനറല്‍ സൂപ്പര്‍വൈസര്‍ ഡോ. അബ്ദുല്ല അല്‍റബീഅ പറഞ്ഞു.
സൗഹൃദ, സാഹോദര്യ രാജ്യങ്ങളില്‍ പലവിധ പ്രയാസങ്ങളും ദുരന്തങ്ങളും ദുരിതങ്ങളുമുണ്ടായാല്‍ ആശ്രയമായി അവര്‍ക്കൊപ്പം തങ്ങളുണ്ടാവുമെന്ന സൗദി അറേബ്യയുടെ പ്രഖ്യാപനമാണ് ഇതെന്നും അദ്ദേഹം കൂട്ടിച്ചേര്‍ത്തു. സുഡാന് ഇപ്പോള്‍ നല്‍കുന്ന സഹായം ആ ജനതയുമായുള്ള ശക്തമായ സാഹോദര്യബന്ധത്തെ പ്രതിഫലിപ്പിക്കുന്നതാണെന്നും ഡോ. റബീഅ പറഞ്ഞു.
സുഡാനിലെ ആറ് സംസ്ഥാനങ്ങളെ ബാധിക്കുന്ന നിലയിലാണ് വെള്ളപ്പൊക്കമുണ്ടായത്. നിരവധി പേരുടെ മരണത്തിനുമിടയാക്കി. വെള്ളപ്പൊക്ക ദുരന്തങ്ങളെയും നാശനഷ്ടങ്ങളെയും കുറിച്ച്‌ സുഡാന് മന്ത്രിസഭ ഞായറാഴ്ച ജാഗ്രതയും അടിയന്തരാവസ്ഥയും പ്രഖ്യാപിച്ചിരുന്നു. ഇതിനിടയിലാണ് ദുരിതമനുഭവിക്കുന്നവര്‍ക്ക് ആശ്വാസമേകി സല്‍മാന്‍ രാജാവ് നിര്‍ദേശം പുറപ്പെടുവിച്ചത്.
