കടയ്ക്കല്‍: കടയ്ക്കല്‍ മേഖലയില്‍ ടിപ്പറുകളുടെ മരണപ്പാച്ചില്‍ ഭീഷണിയാകുന്നു. ഇടറോഡുകള്‍പോലും ടിപ്പറുകള്‍ കൈയടക്കിയിരിക്കുകയാണ്.
ജനങ്ങളുടെ ജീവനും റോഡിന്‍റെ തകര്‍ച്ചക്കും ഭീഷണിയായ ടിപ്പറുകളെ നിയന്ത്രിക്കാനാരുമില്ല.
ചിതറ, കുമ്മിള്‍ പഞ്ചായത്ത് മേഖലകളിലാണ് കൂടുതല്‍ ക്വാറികളും ക്രഷര്‍ യൂനിറ്റുകളും പ്രവര്‍ത്തിക്കുന്നത്. ചിതറയിലെ ചക്കമലയിലും പരിസരങ്ങളിലുമായി മൂന്നിലധികം വന്‍കിട ക്വാറി/ ക്രഷര്‍ യൂനിറ്റുകളാണ് പ്രവര്‍ത്തിക്കുന്നത്. കുമ്മിള്‍ കടയ്ക്കല്‍, ഇട്ടിവ പഞ്ചായത്തുകളിലും വിഴിഞ്ഞം പദ്ധതിക്കായി പാറ നല്‍കുന്നതടക്കമുള്ള നിരവധി ക്വാറികളും പ്രവര്‍ത്തിക്കുന്നുണ്ട്.
ഇവിടങ്ങളില്‍നിന്ന് പാറയും അനുബന്ധ സാധനങ്ങളും കൊണ്ടുപോകുന്നതിനായി നാനാഭാഗങ്ങളില്‍നിന്നാണ് ടിപ്പറുകളെത്തുന്നത്. പുലര്‍ച്ച മൂന്നുമുതല്‍ അമിത വേഗത്തില്‍ ടിപ്പറുകള്‍ പായുന്നു. സംസ്ഥാന പാതയായ പാരിപ്പള്ളി – മടത്തറ റോഡിനെ കൂടാതെ ചടയമംഗലം – ചിങ്ങേലി – പാങ്ങോട്, അഞ്ചല്‍ – കടയ്ക്കല്‍, കിളിമാനൂര്‍ – തൊളിക്കുഴി-കുമ്മിള്‍ റോഡുകളിലും പാറയും മെറ്റില്‍ ഉള്‍പ്പെടെയുള്ള സാധനങ്ങളും അമിതമായി കയറ്റിയാണ് പാച്ചില്‍. അനുവദിച്ചിട്ടുള്ള സമയക്രമങ്ങളൊന്നും ഇവക്ക് ബാധകമല്ല.
അമിത ലോഡ് കയറ്റിയ ടിപ്പര്‍ ലോറി ചടയമംഗലം മുസ്ലിം ജമാഅത്തിന്‍റെ മതില്‍ തകര്‍ത്തതും കുമ്മിള്‍ തുളസി മുക്കില്‍ ടിപ്പറുകള്‍ കൂട്ടിയിടിച്ച്‌ ഒന്നിന്‍റെ ബോഡിയൊന്നാകെ ഇളകി റോഡില്‍ തെറിച്ചുവീണതും വിഴിഞ്ഞം പദ്ധതിക്ക് വേണ്ട കൂറ്റന്‍ പാറയുമായി പോയ ടിപ്പര്‍ ഊന്നന്‍ കല്ല് ഭാഗത്ത് മറിഞ്ഞതും നടപാറയില്‍ ലോറിയില്‍നിന്ന് പാറ റോഡിലേക്ക് വീണ അപകടത്തില്‍നിന്ന് വീട്ടമ്മ കഷ്ടിച്ച്‌ രക്ഷപ്പെട്ടതുമായ സംഭവങ്ങള്‍ അടുത്തിടെ നടന്നതാണ്.
ടിപ്പറുകളുടെ നിരന്തര ഓട്ടം അടുത്തിടെ നവീകരിച്ച ചടയമംഗലം – ചിങ്ങേലി – പാങ്ങോട് റോഡ് ഉള്‍പ്പെടെയുള്ള പ്രധാന റോഡുകളുടെയും കടയ്ക്കല്‍ സീഡ് ഫാം – ടൗണ്‍ഹാള്‍ റോഡുപോലുള്ള ഒട്ടേറെ ഇടറോഡുകളുടെയും തകര്‍ച്ചക്ക് കാരണമായി. ടിപ്പര്‍ പാച്ചിലില്‍ റോഡില്‍ അസഹ്യമായി പൊടി ഉയരുന്നതും നാട്ടുകാരുടെ എതിര്‍പ്പിന് ഇടയാക്കിയിട്ടുണ്ട്. സമരപരിപാടികളുമായി രംഗത്തിറങ്ങാന്‍ ഒരുങ്ങുകയാണ് നാട്ടുകാര്‍.
