മനാമ: ഇന്ത്യയിലെ അറിയപ്പെടുന്ന സാംസ്കാരിക- വിദ്യാഭ്യാസ സ്ഥാപനമായ ജാമിഅ മര്‍കസിന്റെ 45ാം വാര്‍ഷിക ദിനാഘോഷങ്ങളുടെ ഭാഗമായി മര്‍കസ് ചാന്‍സലര്‍ കാന്തപുരം എ.പി.
അബൂബക്കര്‍ മുസ്‌ലിയാര്‍ വ്യാഴാഴ്ച ബഹ്‌റൈനിലെത്തും. മര്‍കസ് ബഹ്‌റൈന്‍ ചാപ്റ്റര്‍ കമ്മിറ്റിയും ബഹ്‌റൈന്‍ ഐ.സി.എഫും സംയുക്തമായി റമദാന്‍ 21ാം രാവായ ഇന്ന് രാത്രി 9.30ന് മനാമ പാകിസ്താന്‍ ക്ലബില്‍ സംഘടിപ്പിക്കുന്ന മഹ്‌ളറത്തുല്‍ ബദ്‌രിയ ആത്മീയസംഗമത്തിന് അദ്ദേഹം നേതൃത്വം നല്‍കും. മര്‍കസ് പി.ആര്‍.ഒ മര്‍സൂഖ് സഅദി പാപ്പിനിശ്ശേരി മുഖ്യപ്രഭാഷണം നടത്തും. ബഹ്‌റൈനിലെ സാമൂഹിക- സാംസ്കാരിക രംഗത്തെ പ്രമുഖ വ്യക്തിത്വങ്ങള്‍ പരിപാടിയില്‍ സംബന്ധിക്കും.
മര്‍കസ് മുന്നോട്ടുവെച്ച വിജ്ഞാന വിനിമയത്തിന്റെ പുതിയ തലങ്ങളെ സമൂഹത്തിന് പരിചയപ്പെടുത്തുക എന്ന ലക്ഷ്യത്തോടെ വിവിധ പദ്ധതികളാണ് മര്‍കസ് ഡേ ആഘോഷത്തോടനുബന്ധിച്ച്‌ ആസൂത്രണം ചെയ്തിട്ടുള്ളത്. മര്‍കസ് ഡേയോടനുബന്ധിച്ച്‌ ബഹ്‌റൈന്‍ ചാപ്റ്റര്‍ ഇന്നും നാളെയുമായി സംഘടിപ്പിക്കുന്ന വിവിധ പരിപാടികളില്‍ കാന്തപുരം സംബന്ധിക്കും. പാകിസ്താന്‍ ക്ലബില്‍ ഇന്ന് നടക്കുന്ന ആത്മീയസംഗമത്തിന് സ്ത്രീകള്‍ക്ക് പ്രത്യേക സൗകര്യം ഏര്‍പ്പെടുത്തിയിട്ടുണ്ട്. വിശദ വിവരങ്ങള്‍ക്ക് 39088058 എന്ന നമ്ബറില്‍ ബന്ധപ്പെടാവുന്നതാണ്.
