മനാമ: ബഹ്റൈനിലെ നാല് ഗവര്ണറേറ്റ് പരിധികളില് ആധുനിക സെന്ട്രല് മാര്ക്കറ്റുകള് സ്ഥാപിക്കുന്നതിനുള്ള നടപടികള് പുരോഗമിക്കുന്നു.
ദക്ഷിണ മുനിസിപ്പല് കൗണ്സില് സംഘടിപ്പിച്ച യോഗത്തില് പൊതുമരാമത്ത്, മുനിസിപ്പാലിറ്റികാര്യ, നഗരാസൂത്രണ മന്ത്രി ഇസാം ഖലഫാണ് ഇക്കാര്യം അറിയിച്ചത്.
നിലവിലുള്ള സെന്ട്രല് മാര്ക്കറ്റുകളുടെ നവീകരണമോ അല്ലെങ്കില് സ്വകാര്യ മേഖലയുമായി ചേര്ന്ന് പുതിയ മാര്ക്കറ്റുകള് സ്ഥാപിക്കാനോ ആണ് ഉദ്ദേശിക്കുന്നത്. വ്യാപാരികളുടെയും വില്പനക്കാരുടെയും ഉപഭോക്താക്കളുടെയും വലിയൊരു സംഘത്തെ ഉള്ക്കൊള്ളുന്ന വിശാലമായ കേന്ദ്രമാണ് ഉദ്ദേശിക്കുന്നതെന്ന് മന്ത്രി പറഞ്ഞു.
അതേസമയം, സല്ലാഖില് മിനി മാര്ക്കറ്റ് ആരംഭിക്കുന്നതിനുള്ള നിര്ദേശം അദ്ദേഹം തള്ളിക്കളഞ്ഞു. സ്ഥല, ബജറ്റ് പരിമിതിയാണ് ഇതിന് കാരണമായി ചൂണ്ടിക്കാണിച്ചത്.
എല്ലാ സൗകര്യങ്ങളുമുള്ള, സര്ക്കാര് ഉടമസ്ഥതയിലുള്ള സ്ഥലമാണ് സെന്ട്രല് മാര്ക്കറ്റ് സ്ഥാപിക്കാന് കണ്ടെത്തേണ്ടത്. ചുരുങ്ങിയത് 10,000 ചതുരശ്ര മീറ്റര് ഇതിനു വേണം. ഇത്തരമൊരു സ്ഥലം ലഭ്യമല്ലാത്തതാണ് സല്ലാഖില് മിനി മാര്ക്കറ്റ് സ്ഥാപിക്കുന്നതിന് തടസ്സമായത്. ഹമദ് ടൗണില് ഒരു പരമ്ബരാഗത മാര്ക്കറ്റ് സ്ഥാപിക്കാന് മന്ത്രാലയം ഉദ്ദേശിക്കുന്നുണ്ട്.
സല്ലാഖ് ഉള്പ്പെടെയുള്ള സമീപ പ്രദേശങ്ങളില് ആളുകള്ക്ക് എളുപ്പത്തില് ഇവിടെ എത്തിച്ചേരാന് കഴിയുമെന്ന് മന്ത്രി പറഞ്ഞു.