ന്യൂഡല്ഹി: അടുത്തിടെ സര്വിസ് ആരംഭിച്ച ആകാശ എയറില്നിന്ന് വിവരങ്ങള് ചോര്ന്നു.
ഗുണഭോക്താക്കളെക്കുറിച്ചുള്ള വിവരങ്ങള് അടക്കമാണ് അജ്ഞാതന് ചോര്ത്തിയത്. വിവരങ്ങള് ചോരാനിടയായതില് എയര്ലൈന് ഗുണഭോക്താക്കളോട് മാപ്പുപറഞ്ഞു. ഇതുസംബന്ധിച്ച് നോഡല് ഏജന്സിയായ ഇന്ത്യന് കമ്ബ്യൂട്ടര് എമര്ജന്സി റെസ്പോണ്സ് ടീമിന് പരാതി നല്കിയതായും അധികൃതര് അറിയിച്ചു.
ഈ മാസം 25ന് കമ്ബനിയുടെ ലോഗിനിലും സൈന്അപ് സര്വിസിലും സാങ്കേതിക തകരാര് ശ്രദ്ധയില്പെട്ടിരുന്നു. അതിനാല് യാത്രക്കാര് രജിസ്ട്രേഷന് നല്കുന്ന പേര്, ഇ-മെയില് ഐ.ഡി, ഫോണ് നമ്ബര് അടക്കമുള്ള വിവരങ്ങള് അജ്ഞാതനായ മറ്റൊരാള് കണ്ടിരിക്കാമെന്നും എയര്ലൈന് വൈബ്സൈറ്റില് വ്യക്തമാക്കി. എന്നാല്, ഗുണഭോക്താക്കളുടെ യാത്രകള് സംബന്ധിച്ച വിവരങ്ങള് ഇതില് ഉള്പ്പെട്ടിട്ടില്ലെന്ന് തങ്ങള് ഉറപ്പുവരുത്തിയതായും കമ്ബനി അവകാശപ്പെട്ടു. പ്രശ്നം ശ്രദ്ധയില്പെട്ടതോടെ ഇത് പ്രതിരോധിക്കുന്നതിനുള്ള നടപടി കൈക്കൊണ്ടിട്ടുണ്ടെന്നും കമ്ബനി വ്യക്തമാക്കി. ഈ മാസം ഏഴിനാണ് ആകാശ എയര് വിമാന സര്വിസ് ആരംഭിച്ചത്. കമ്ബനിയുടെ പ്രധാന നിക്ഷേപകരിലൊരാളായ രാകേഷ് ജുന്ജുന്വാല ഈയിടെ മരിച്ചിരുന്നു.