ദോഹ: ലോകകപ്പ് ഗ്രൂപ് റൗണ്ടില്‍ ആതിഥേയരായ ഖത്തര്‍ കളിക്കുന്ന ഗ്രൂപ്പിലെ സൂപ്പര്‍ താരമാണ് സെനഗാളിന്റെ സാദിയോ മാനെ.
ഖത്തറിനും നെതര്‍ലന്‍ഡ്സിനും എക്വഡോറിനുമെല്ലാം ഏറ്റവും ഭീഷണി ഉയര്‍ത്തുന്നതും ബയേണ്‍ മ്യൂണികിന്റെ ഈ ഗോള്‍ മെഷീന്‍ തന്നെ. എന്നാല്‍, സ്വന്തം മണ്ണില്‍ ആതിഥേയരായ ഖത്തറിനെ കരുതിയിരിക്കണമെന്നാണ് മാനെയുടെ അഭിപ്രായം.
ഗാലറിയില്‍ നാട്ടുകാര്‍ നിറയുമ്ബോള്‍ ഖത്തര്‍ അപകടകാരികളാണെന്നും മത്സരം വെല്ലുവിളി നിറഞ്ഞതായിരിക്കുമെന്നും സെനഗാള്‍ സൂപ്പര്‍ താരം പറയുന്നു. ലോകകപ്പില്‍ ഗ്രൂപ് ഘട്ടവും പിന്നിട്ട് കൂടുതല്‍ മുന്നേറാനാണ് സെനഗാള്‍ ലക്ഷ്യമിടുന്നതെന്നും ഫിഫ വെബ്സൈറ്റിന് നല്‍കിയ അഭിമുഖത്തില്‍ മാനെ പറഞ്ഞു.
‘ഏഷ്യന്‍ ചാമ്ബ്യന്മാരായാണ് ഖത്തര്‍ ലോകകപ്പിനെത്തുന്നത്. നാട്ടില്‍ നടക്കുന്ന ലോകകപ്പില്‍ അവര്‍ക്ക് മുന്‍തൂക്കം ഏറെയാണ്. ഗ്രൂപ്പില്‍ ഒരു ടീമിനെയും വിലകുറച്ച്‌ കാണുന്നില്ല’ -ആഫ്രിക്കന്‍ പ്ലെയര്‍ ഓഫ് ദി ഇയറായി തെരഞ്ഞെടുക്കപ്പെട്ട മാനേ കൂട്ടിച്ചേര്‍ത്തു. ‘എല്ലാ മത്സരങ്ങളെയും ഗൗരവത്തോടെയാണ് സമീപിക്കുന്നത്. എന്നിരുന്നാലും ഒരു സമയം ഒരു മത്സരത്തില്‍ മാത്രമായിരിക്കും ശ്രദ്ധ’ -മുന്‍ ലിവര്‍പൂള്‍ താരം കൂടിയായി മാനെ കൂട്ടിച്ചേര്‍ത്തു.
2002ലെ സെനഗാള്‍ തലമുറയാണ് ഞങ്ങളുടെ റോള്‍മോഡലുകള്‍. സെനഗാളിന് ലോക ഫുട്ബാള്‍ ഭൂപടത്തില്‍ ഇടം കണ്ടെത്തിയ സംഘം. ഞങ്ങളുടെ രാജ്യത്തിന്റെ ചരിത്രം അവര്‍ പുനരാഖ്യാനിക്കുകയായിരുന്നു. പല റെക്കോഡുകളും തിരുത്തിക്കുറിച്ചവരായിരുന്നു അവര്‍. ഈ വര്‍ഷം ആദ്യത്തില്‍ ആഫ്രിക്കന്‍ നേഷന്‍സ് കപ്പ് കിരീടം ഞങ്ങള്‍ നേടിയപ്പോള്‍ അവരെത്ര മാത്രം വികാരഭരിതരായിട്ടുണ്ടാകും’ -താരം പറഞ്ഞു. നവംബര്‍ 21ന് തുമാമ സ്റ്റേഡിയത്തില്‍ നെതര്‍ലന്‍ഡ്സുമായാണ് സെനഗാളിന്റെ ലോകകപ്പിലെ ആദ്യ മത്സരം. നവംബര്‍ 25ന് അതേ വേദിയില്‍ ആതിഥേയരായ ഖത്തറിനെയും 29ന് ഖലീഫ രാജ്യാന്തര സ്റ്റേഡിയത്തില്‍ ഇക്വഡോറിനെയും അവര്‍ നേരിടും.
