കൊല്ലം: എഐ ക്യാമറയില്‍ പിടിക്കപ്പെടാതിരിക്കാൻ ബൈക്കിന്റെ നമ്ബര്‍ പ്ലേറ്റ് ഇളക്കി മാറ്റി കറങ്ങി നടന്ന യുവാവ് പിടിയില്‍.
കൊല്ലം കടയ്‌ക്കല്‍ തട്ടത്തുമല സ്വദേശി അഭിജിത്തിനെയാണ് മോട്ടോര്‍ വാഹന വകുപ്പ് പിടികൂടിയത്. ഇയാളുടെ വാഹനം പോലീസ് പിടിച്ചെടുത്തു. കൂടാതെ ഇയാളുടെ ബുള്ളറ്റിന് രൂപമാറ്റം വരുത്തിയതാണെന്നും കണ്ടെത്തി.
അമിത വേഗതയില്‍ ബൈക്കോടിച്ചതിനും വാഹനം ഓടിച്ചപ്പോള്‍ മൊബൈല്‍ ഫോണ്‍ ഉപയോഗിച്ചതിനുമടക്കം 15,500 രൂപ പിഴയായി ഈടാക്കി. പ്രതി കടയ്‌ക്കല്‍ നിന്നും ചിതറയിലേയ്‌ക്ക് പോകുന്ന വഴിയിലാണ് മോട്ടോര്‍ വാഹന വകുപ്പ് സംഘത്തിന്റെ പിടിയിലായത്. മോട്ടോര്‍ വാഹനവകുപ്പിന്റെ കൊല്ലം എൻഫോഴ്സ് ടീമാണ് ഇയാളെ അറസ്റ്റ് ചെയ്തത്.
