ഷാർജ: ജനങ്ങളുടെ സുരക്ഷ ഉറപ്പുവരുത്തുന്നതിൻ്റെ ഭാഗമായി യാചകർക്ക് നിയന്ത്രണം ഏർപ്പെടുത്താൻ ഒരുങ്ങി ഷാർജ. റമാദാനിൽ ഭിക്ഷാടനം വർദ്ധിച്ച് വരുന്നതായും സീസണൽ ചാചകരെ കണ്ടാൽ അറിയിക്കണമെന്നും പൊതു ജനങ്ങളോട് പോലീസ് അഭ്യർത്ഥിച്ചു. പ്രധാന നഗരങ്ങളിൽ പട്രോളിങ് നടത്തുമെന്നും ഉദ്യോഗസ്ഥർ വ്യക്തമാക്കി.
ആളുകളുടെ മത വിശ്വാസത്തേയും ജീവകാരുണ്യ മനോഭാവങ്ങളേയും ചൂഷണം ചെയ്താണ് ചിലർ നഗരത്തിൽ ഭിക്ഷാടനം നടത്തുന്നത്. ഇതിനെതിരെയാണ് പോലീസ് മുന്നറിയിപ്പ് നൽകിയിരിക്കുന്നത്. ഇത്തരത്തിലുള്ള തട്ടിപ്പുകളിൽ വീഴാതിരിക്കാൻ പൊതുജനങ്ങൾക്ക് ബോധവത്ക്കരിക്കുന്നതിന് അറബിക്, ഇംഗ്ലീഷ്, ഉറുദു എന്നീ ഭാഷകളിലായി ഭിക്ഷാടന വിരുദ്ധ ക്യാമ്പെയിനും ഷാർജ പോലീസിൻ്റെ നേതൃത്വത്തിൽ ആരംഭിച്ചിട്ടുണ്ട്.
റമദാൻ മാസത്തിൽ പള്ളികളിലും തിരക്കേറിയ മറ്റ് സ്ഥലങ്ങളിലും ക്യാമ്പെയിനും പോലീസ് പട്രോളിങ്ങും ശക്തമാക്കും. ഭിക്ഷാടന സംഘങ്ങൾ പൊതുജന ശല്യം എന്നതിലവുപരിയായി അവർ നടത്തുന്നത് നിയമവിരുദ്ധ പ്രവർത്തനമാണെന്നും ഷാർജ പൊലീസ് മുന്നറിയിപ്പ് നൽകി.
