ആലപ്പുഴ: സി.പി.ഐ മന്ത്രിമാര്‍ക്ക് മുഖ്യമന്ത്രിയെ ഭയമാണെന്ന് മുന്‍ പ്രതിപക്ഷ നേതാവ് രമേശ് ചെന്നിത്തല.
സംസ്ഥാനത്ത് ഇപ്പോള്‍ മന്ത്രിമാരില്ല. മുഖ്യമന്ത്രി പിണറായി വിജയന്‍ മാത്രമാണുള്ളത്. ലോകായുക്തയുടെ സുപ്രധാന ഓര്ഡിനന്സ് വന്നപ്പോള്‍ സി.പി.ഐ മന്ത്രിമാര്‍ ആരും മിണ്ടിയില്ല. സി.പി.ഐ സംസ്ഥാന സെക്രട്ടറി പറഞ്ഞത് അവരോട് ചോദിക്കണമെന്നാണ്. ഇക്കാര്യം മന്ത്രിസഭ യോഗത്തില്‍ ചര്‍ച്ചചെയ്തില്ലെന്നതിന്‍റെ ഉദാഹരണമാണിതെന്ന് രമേശ് ആലപ്പുഴയില്‍ വാര്‍ത്തസമ്മേളനത്തില്‍ പറഞ്ഞു.
മുഖ്യമന്ത്രി പിണറായി വിജയന്‍റെ ദുബൈ യാത്ര വെട്ടിച്ചുരുക്കി കേരളത്തിലേക്ക് മടങ്ങണം. നേരത്തേ പരിപാടി നിശ്ചയിക്കാതെ ഒമ്ബതുദിവസം ദുബൈയില്‍ കഴിയുന്നതിന്‍റെ കാരണം ആര്‍ക്കുമറിയില്ല. സംസ്ഥാനത്തെ ജനങ്ങള്‍ അഭിമുഖീകരിക്കുന്ന അതിഗുരുതര കോവിഡ് സാഹചര്യങ്ങളെ നിയന്ത്രിക്കാന്‍ മടങ്ങിവന്ന് പ്രതിരോധപ്രവര്‍ത്തനങ്ങള്‍ ഏകോപിപ്പിക്കണം.
ലോകായുക്ത വിഷയത്തില്‍ മുഖ്യമന്ത്രി നിലപാട് വ്യക്തമാക്കണം. ഓര്ഡിനന്സ് നിയമസഭയോടുള്ള അവഹേളനമാണ്. പൊതുസമൂഹം ഓര്‍ഡിനന്‍സിനോട് എതിരാണെന്നും അദ്ദേഹം പറഞ്ഞു.
