ജിദ്ദ: വികസനം കൈവരിക്കുന്നതിനും ജീവനും സ്വത്തിനും സംരക്ഷണം നല്‍കുന്നതിനും സുരക്ഷ അനിവാര്യമെന്ന് സൗദി ആഭ്യന്തരമന്ത്രി അമീര്‍ അബ്ദുല്‍ അസീസ് ബിന്‍ സഊദ് ബിന്‍ നാഇഫ്.
കിഴക്കന്‍ മേഖലയിലെ അബ്‌ഖൈഖ് ഗവര്‍ണറേറ്റിലെ ഇന്‍സ്റ്റിറ്റ്യൂഷന്‍സ് സെക്യൂരിറ്റി ഫോഴ്‌സ് ട്രെയിനിങ് ഇന്‍സ്റ്റിറ്റ്യൂട്ടില്‍ ആഭ്യന്തര മന്ത്രാലയം ആതിഥേയത്വം വഹിച്ച ജി.സി.സി രാജ്യങ്ങളുടെ മൂന്നാമത് അറബ് ഗള്‍ഫ് സംയുക്ത സൈനികാഭ്യാസത്തിന്റെ സമാപന ചടങ്ങില്‍ സംസാരിക്കുകയായിരുന്നു ആഭ്യന്തരമന്ത്രി.
സുരക്ഷാസേനകള്‍ തമ്മിലുള്ള ഏകോപനവും സഹകരണവും ശാശ്വതമായി മെച്ചപ്പെടുത്തുന്നതിനും സന്നദ്ധത വര്‍ധിപ്പിക്കുന്നതിനുള്ള ശ്രമങ്ങള്‍ ഏകീകരിക്കുന്നതിനുമാണ് സംയുക്ത സൈനികാഭ്യാസം.
അതോടൊപ്പം ജി.സി.സി രാജ്യങ്ങളിലെ ഭരണാധികാരികളുടെ മഹത്തായ നിര്‍ദേശങ്ങള്‍ സഫലമാക്കുകയെന്ന ലക്ഷ്യവുമുണ്ട്. കോവിഡിനെ വലിയ സുരക്ഷാശ്രമങ്ങളോടെ വിജയകരമായി നേരിട്ടതിനു ശേഷമാണ് ഈ അഭ്യാസമെന്ന് ആഭ്യന്തരമന്ത്രി സൂചിപ്പിച്ചു. ഈ സമയത്ത് ജി.സി.സി രാജ്യങ്ങളിലെ സുരക്ഷാ വകുപ്പുകള്‍ക്ക് ബന്ധപ്പെട്ട വകുപ്പുകളുടെ പങ്കാളിത്തത്തോടെ മുന്‍കരുതലുകള്‍ നടപ്പാക്കാനും പൗരന്മാരുടെയും താമസക്കാരുടെയും ആരോഗ്യ സംരക്ഷണത്തിന് ആവശ്യമായ കാര്യങ്ങള്‍ കൈകാര്യം ചെയ്യാനും കഴിഞ്ഞു. അറബ്-ഗള്‍ഫ് രാജ്യങ്ങളുടെ സുരക്ഷക്കും സുസ്ഥിരതക്കും ഭീഷണിയാകുന്ന എല്ലാത്തിലും നാമെല്ലാവരും ഒറ്റക്കെട്ടായി നിലകൊള്ളും. ഞങ്ങളുടെ സുരക്ഷയില്‍ വിട്ടുവീഴ്ച ചെയ്യുന്നതോ ഞങ്ങളുടെ കഴിവുകളില്‍ കൈകടത്തുന്നതോ വ്യക്തികളുടെയും സ്ഥാപനങ്ങളുടെയും സുരക്ഷയെ ഏതുവിധേനയും അപകടത്തിലാക്കുന്നതോ ആയ എല്ലാ ശ്രമങ്ങളെയും ഞങ്ങള്‍ നിരസിക്കുന്നു. ജി.സി.സി രാജ്യങ്ങളുടെ സുരക്ഷ അവിഭാജ്യമാണ് എന്നതാണ് ഞങ്ങള്‍ എല്ലാവരും അംഗീകരിക്കുന്ന സന്ദേശം. ജി.സി.സി രാജ്യങ്ങള്‍ ദൈവത്തിന്റെ കൃപയോടെയും ഭരണാധികാരികളുടെ ഉദാത്തമായ കാഴ്ചപ്പാടോടും എല്ലാ മേഖലകളിലും സമഗ്രമായ വികസന നവോത്ഥാനം അനുഭവിച്ചുകൊണ്ടിരിക്കുന്നുവെന്നും ആഭ്യന്തരമന്ത്രി പറഞ്ഞു.
സല്‍മാന്‍ രാജാവിന്റെയും കിരീടാവകാശിയുടെയും ആശംസകള്‍ ചടങ്ങില്‍ സംബന്ധിച്ച ജി.സി.സി രാജ്യങ്ങളിലെ ആഭ്യന്തരമന്ത്രിമാര്‍ക്കും ഉന്നതര്‍ക്കും തുടക്കത്തില്‍ മന്ത്രി അറിയിച്ചു. ജി.സി.സി രാജ്യങ്ങളിലെ ഭരണാധികാരികളുടെ പരിധിയില്ലാത്ത പിന്തുണക്കും ഉദാരമായ മാര്‍ഗനിര്‍ദേശത്തിനും ആഭ്യന്തരമന്ത്രിമാര്‍ക്കും ഫീല്‍ഡ് കമാന്‍ഡര്‍മാര്‍ക്കും സൈനികാഭ്യാസത്തില്‍ പങ്കെടുത്തവര്‍ക്കും ആഭ്യന്തരമന്ത്രി നന്ദി രേഖപ്പെടുത്തി.
കോവിഡ് നേരിടുന്നതില്‍ ജി.സി.സി രാജ്യങ്ങളിലെ സുരക്ഷാ വിഭാഗങ്ങള്‍ നടത്തിയ ശ്രമങ്ങള്‍ വിവരിക്കുന്ന ദൃശ്യചിത്രം ആഭ്യന്തരമന്ത്രിയും സദസ്സും വീക്ഷിച്ചു. ശേഷം വേദിക്കു മുന്നില്‍ സൈനികരുടെ അഭ്യാസം നടന്നു. ചടങ്ങില്‍ നാലാമത് അറബ് ഗള്‍ഫ് സുരക്ഷ സൈനികാഭ്യാസത്തിനുള്ള ബാനര്‍ ഖത്തറിന് കൈമാറി.
യു.എ.ഇ ഉപപ്രധാനമന്ത്രിയും ആഭ്യന്തരമന്ത്രിയുമായ ലെഫ്റ്റനന്‍റ് ജനറല്‍ സൈഫ് ബിന്‍ സായിദ് അല്‍ നഹ്യാന്‍, ബഹ്റൈന്‍ ആഭ്യന്തരമന്ത്രി ലെഫ്റ്റനന്‍റ് ജനറല്‍ ശൈഖ് റാഷിദ് ബിന്‍ അബ്ദുല്ല അല്‍ ഖലീഫ, ഒമാന്‍ ആഭ്യന്തരമന്ത്രി ഹമൂദ് ബിന്‍ ഫൈസല്‍ അല്‍ ബുസഈദി, ജി.സി.സി കൗണ്‍സില്‍ സെക്രട്ടറി ജനറല്‍ ഡോ. നായിഫ് ഫലാഹ് അല്‍ ഹജ്‌റഫ്, ഖത്തര്‍ ആഭ്യന്തര മന്ത്രാലയം അണ്ടര്‍ സെക്രട്ടറി മേജര്‍ ജനറല്‍ അബ്ദുല്‍ അസീസ് ബിന്‍ ഫൈസല്‍ അല്‍താനി, കുവൈത്ത് ആഭ്യന്തര മന്ത്രാലയം അണ്ടര്‍ സെക്രട്ടറി മേജര്‍ ജനറല്‍ അന്‍വര്‍ അബ്ദുല്ലത്തീഫ് അല്‍ ബര്‍ജാസ് എന്നിവര്‍ സംയുക്ത സൈനികാഭ്യാസ ചടങ്ങില്‍ സംബന്ധിച്ചു.
കൂടാതെ കിഴക്കന്‍ പ്രവിശ്യാ ഡെപ്യൂട്ടി ഗവര്‍ണര്‍ അമീര്‍ അഹമദ് ബിന്‍ ഫഹദ് ബിന്‍ സല്‍മാന്‍, ആഭ്യന്തര ഉപമന്ത്രി ഡോ. നാസര്‍ ബിന്‍ അബ്ദുല്‍ അസീസ് അല്‍ ദാവൂദ്, സ്റ്റേറ്റ് സെക്യൂരിറ്റി അസിസ്റ്റന്റ് മേധാവി അബ്ദുല്ല ബിന്‍ അബ്ദുല്‍ കരീം അല്‍ ഇസ, ജി.സി.സി രാജ്യങ്ങളിലെ ആഭ്യന്തര മന്ത്രാലയങ്ങളിലെ നിരവധി ഉന്നത ഉദ്യോഗസ്ഥരും ചടങ്ങില്‍ പങ്കെടുത്തു.
