ന്യൂഡല്ഹി: കോഴിക്കോട് കോടഞ്ചേരിയിലെ ഡി.വൈ.എഫ്.ഐ നേതാവിന്റെ മിശ്രവിവാഹവുമായി ബന്ധപ്പെട്ട വിവാദങ്ങളില് പ്രതികരിച്ച് പാര്ട്ടി ജനറല് സെക്രട്ടറി സീതാറാം യെച്ചൂരി.
മിശ്രവിവാഹങ്ങള് ഇല്ലാതാക്കാനുള്ള ശ്രമമാണ് ലൗ ജിഹാദ് കൊണ്ട് ഉദ്ദേശിക്കുന്നതെന്ന് അദ്ദേഹം പറഞ്ഞു. ഷെജിന് – ജ്യോത്സ്ന വിവാഹത്തില് ലൗ ജിഹാദ് ഉണ്ടെന്ന സി.പി.എം നേതാവ് ജോര്ജ് എം. തോമസിന്റെ പരാമര്ശത്തെ അദ്ദേഹം തള്ളിക്കളയുകയും ചെയ്തു.
ഭിന്നവിശ്വാസങ്ങളിലും മതങ്ങളിലും പെട്ടവര് മിശ്രവിവാഹം നടത്തുന്നതിന് നിരോധനമുള്ള രാജ്യമല്ല ഇന്ത്യയെന്നും എന്താണ് ലവ് ജിഹാദ് എന്നതുകൊണ്ട് അര്ത്ഥമാക്കുന്നതെന്നും അദ്ദേഹം ചോദിച്ചു. ‘ഒരു വ്യക്തിക്ക് ജാതിക്കും മതത്തിനും അതീതമായി, ഇഷ്ടപ്പെട്ട ജീവിത പങ്കാളിയെ തിരഞ്ഞെടുക്കാന് ഭരണഘടനാപരമായി അവകാശമുണ്ട്. ആ അധികാരത്തെ ആര്ക്കും ചോദ്യം ചെയ്യാനാവില്ല. മിശ്ര വിവാഹങ്ങള് ഇല്ലാതാക്കാനാണ് ലവ് ജിഹാദ് പ്രചാരണം. ജോര്ജ് എം. തോമസിന്റെ പരാമര്ശം സംസ്ഥാന ഘടകം പരിശോധിക്കും’, യെച്ചൂരി വ്യക്തമാക്കി.
അതേസമയം, വിവാദങ്ങളവസാനിപ്പിച്ച് ജീവിക്കാന് അനുവദിക്കണമെന്ന് കോടഞ്ചരിയിലെ മിശ്രവിവാഹ വിവാദത്തില്പ്പെട്ട ഷെജിനും ജ്യോത്സ്നയും വ്യക്തമാക്കി. കോഴിക്കോട് കോടഞ്ചേരി സ്വദേശി എം.എസ്. ഷെജിനും കോടഞ്ചേരി തെയ്യപ്പാറ സ്വദേശിനി ജ്യോത്സ്ന മേരി ജോസഫുമാണ് വിവാദങ്ങളവസാനിപ്പിക്കാന് അഭ്യര്ത്ഥിക്കുന്നത്. ഇക്കഴിഞ്ഞ ശനിയാഴ്ച വൈകീട്ടാണ് സി.പി.എം ലോക്കല് കമ്മിറ്റി അംഗമായ ഷെജിന് ജ്യോത്സ്ന ജോസഫിനൊപ്പം ഒളിച്ചോടിയത്.