വൈത്തിരി: പൊതുമേഖല ധനകാര്യ സ്ഥാപനമായ കെ.എസ്.എഫ്.ഇയുടെ വൈത്തിരി ശാഖയില് 50 ലക്ഷത്തിലധികം രൂപയുടെ സാമ്ബത്തിക തിരിമറി.
സ്ഥാപനത്തിന്റെ കലക്ഷന് ഇനത്തില് ജീവനക്കാരന് ഉപഭോക്താക്കളില്നിന്ന് ആറുമാസംകൊണ്ട് ശേഖരിച്ച ഭീമമായ സംഖ്യയാണ് ഓഫിസില് അടക്കാതെ വെട്ടിച്ചത്. ആയിരം മുതല് ലക്ഷങ്ങള് വരെ നഷ്ടപ്പെട്ട അമ്ബതിലധികം ഉപഭോക്താക്കളുണ്ട്. കെ.എസ്.എഫ്.ഇയുടെ ഔദ്യോഗിക കലക്ഷന് കാര്ഡില് സംഖ്യ വരവുവെച്ചാണ് പണം ശേഖരിച്ചിരുന്നത്. എന്നാല്, പലര്ക്കും കൈകൊണ്ടെഴുതിയ വ്യാജ രസീത് നല്കുകയായിരുന്നു. സംഭവം പുറത്തായതിനെ തുടര്ന്ന് കോഴിക്കോട് റീജനല് ഓഫിസില്നിന്ന് ഉദ്യോഗസ്ഥരെത്തി അന്വേഷണം നടത്തുകയും വൈത്തിരി പൊലീസ് സ്റ്റേഷനില് പരാതി കൊടുക്കുകയും ചെയ്തിട്ടുണ്ട്.
സ്ഥാപനത്തില് പുതുതായി നിയമനം ലഭിച്ച തളിപ്പുഴ സ്വദേശിയായ ജീവനക്കാരനാണ് തുക വെട്ടിച്ചത്. ഉപഭോക്താക്കളില്നിന്ന് ശേഖരിച്ചതിന്റെ ഒരു വിഹിതം മാത്രം ഓഫിസില് അടച്ചാണ് ഫണ്ട് തിരിമറി ചെയ്തത്. സ്ഥാപന മേധാവികള് ഇടപെട്ടതിനെ തുടര്ന്ന് ഇയാള് 30 ലക്ഷത്തോളം രൂപ തിരിച്ചടച്ചു. എന്നാല്, പല ഉപഭോക്താക്കളുടെയും അടവ് തെറ്റിച്ചു ബാധ്യതയായ തുക ഇതുവരെ നല്കിയിട്ടില്ല. ഈ തുക വെട്ടിപ്പ് നടത്തിയ ജീവനക്കാരനില്നിന്ന് ഉപഭോക്താക്കള് നേരിട്ട് വാങ്ങിനല്കണമെന്ന നിലപാടിലാണ് കെ.എസ്.എഫ്.ഇ അധികൃതര്. തട്ടിപ്പിനിരയായ ഉപഭോക്താക്കള്ക്ക് റിക്കവറി നോട്ടീസ് അയച്ചു ഭീഷണിപ്പെടുത്തുന്ന നിലപാട് കെ.എസ്.എഫ്.ഇ സ്വീകരിക്കുന്നതും വന് പ്രതിഷേധത്തിന് ഇടയാക്കിയിട്ടുണ്ട്.
നീണ്ട കാലയളവില് ഇത്രയും ഭീമമായ സംഖ്യ തിരിമറി നടത്തിയിട്ടും ബ്രാഞ്ചിലെ ഉദ്യോഗസ്ഥര് അറിഞ്ഞില്ലെന്നതും തങ്ങള്ക്ക് ഉത്തരവാദിത്തമില്ലെന്നുമുള്ള നിലപാട് അധികൃതര് സ്വീകരിക്കുന്നത് ഉപഭോക്താക്കളെ പ്രകോപിപ്പിച്ചിട്ടുണ്ട്. ജീവനക്കാരനെ നിയമിച്ചതു മുതല് നാലു മാനേജര്മാര് ഈ ബ്രാഞ്ചില് ജോലി ചെയ്തിരുന്നു. നിലവില് കോഴിക്കോട്, വയനാട് ജില്ലകളിലെ മറ്റു ബ്രാഞ്ചുകളിലാണ് ഇവര് ജോലി ചെയ്യുന്നത്. ഇവര് അറിയാതെ ഇത്രയും വലിയ വെട്ടിപ്പ് നടക്കില്ലെന്ന് വഞ്ചനക്കിരയായ ഉപഭോക്താക്കള് ആരോപിക്കുന്നു. കെ.എസ്.എഫ്.ഇക്കും ജീവനക്കാരനുമെതിരെ കേസ് കൊടുക്കാനുള്ള ശ്രമത്തിലാണ് പണം നഷ്ടപ്പെട്ട ഉപഭോക്താക്കള്. കുറി വിഹിതം അടക്കാത്തതിനോ നറുക്കെടുപ്പു കാര്യം അറിയിക്കുന്നതിനോ കെ.എസ്.എഫ്.ഇയില്നിന്ന് മെസേജുകളൊന്നും ഇവര്ക്ക് ലഭിച്ചിരുന്നില്ല. എന്നാല്, തട്ടിപ്പ് പുറത്തറിഞ്ഞതിനു ശേഷമാണു ജീവനക്കാരനുമായ ഇടപാട് നടത്തരുതെന്ന് കാണിച്ചുള്ള നോട്ടീസ് ഉപഭോക്താക്കള്ക്ക് അയക്കുന്നത്. അതിനുശേഷം കുറി തീയതി അറിയിച്ചുള്ള ഫോണ് മെസേജ് അയക്കാന് തുടങ്ങിയിട്ടുണ്ട്.
സംഭവം അന്വേഷിച്ച് റിപ്പോര്ട്ട് നല്കാന് കെ.എസ്.എഫ്.ഇ തൃശൂര് ഹെഡ് ഓഫിസ് അധികൃതര് റീജനല് ഓഫിസറെ ചുമതലപ്പെടുത്തിയിരുന്നു. റീജനല് ഓഫിസര് വൈത്തിരി ബ്രാഞ്ചിലെത്തി അന്വേഷണം നടത്തി റിപ്പോര്ട്ട് സമര്പ്പിച്ചിട്ടുണ്ട്. റിപ്പോര്ട്ട് പഠിച്ചുവരുകയാണെന്ന് കെ.എസ്.എഫ്.ഇ മേധാവി ‘മാധ്യമ’ത്തോട് പറഞ്ഞു.