മല്ലപ്പള്ളി: വിവാഹം കഴിച്ച ശേഷം യുവതിയെ പീഡനങ്ങള്‍ക്കു വിധേയാക്കുകയും ദൃശ്യങ്ങള്‍ പകര്‍ത്തി പ്രചരിപ്പിക്കുകയും ചെയ്തുവെന്ന പരാതിയില്‍ ഒരാള്‍ പൊലീസ് പിടിയില്‍.
മലപ്പുറം പുളിക്കല്‍ ഒളവട്ടൂര്‍ ചോലക്കരമ്മന്‍ വീട്ടില്‍ സുനില്‍ കുമാറാണ് (42) അറസ്റ്റിലായത്.
ഏഴുമറ്റൂര്‍ സ്വദേശിനിയായ യുവതിയെ അമ്ബലപ്പുഴ ക്ഷേത്രത്തില്‍ വച്ച്‌ 2020 ഫെബ്രുവരി 24-ന് വിവാഹം കഴിച്ചു. തുടര്‍ന്ന്, പലയിടങ്ങളിലെത്തിച്ച്‌ പീഡിപ്പിച്ചശേഷം ചിത്രങ്ങള്‍ പകര്‍ത്തി സുഹൃത്തുക്കള്‍ക്കും മറ്റും നല്‍കിയെന്നാണ് പരാതി.
അമ്ബലപ്പുഴയിലെ ലോഡ്ജിലും യുവതിയുടെ വീട്ടിലും പ്രതിയുടെ മലപ്പുറം കൊണ്ടോട്ടിയിലെ വീട്ടിലുമെത്തിച്ച്‌ ഇയാള്‍ പീഡനങ്ങള്‍ക്കു വിധേയയാക്കി. ഇയാളുടെ സുഹൃത്തുക്കളായ മറ്റ് ആറുപേര്‍ക്ക് ചിത്രങ്ങള്‍ കൈമാറിയെന്നും പരാതിയില്‍ പറയുന്നു.
സുഹൃത്തുക്കള്‍ ഓണ്‍ലൈനിലും ഫേസ്ബുക്ക് പേജിലും പ്രചരിപ്പിക്കുകയും അപകീര്‍ത്തിപ്പെടുത്തുകയും ചെയ്തു. ജില്ലാ സൈബര്‍ സെല്ലിന്‍റെ സഹായത്തോടെ പ്രതിയുടെ ഫോണിന്‍റെ ലൊക്കേഷന്‍ കണ്ടെത്തി മലപ്പുറത്തെ വീട്ടില്‍ നിന്ന് ഇന്നലെ പോലീസ് ഇന്‍സ്‌പെക്ടര്‍ വിപിന്‍ ഗോപിനാഥിന്‍റെ നേതൃത്വത്തില്‍ പിടികൂടുകയായിരുന്നു. പ്രതിയെ യുവതി വീഡിയോ കോള്‍ മുഖേന തിരിച്ചറിഞ്ഞശേഷമായിരുന്നു അറസ്റ്റ്. പ്രതിയെ കോടതിയില്‍ ഹാജരാക്കി.
