മാനന്തവാടി: ദക്ഷിേണന്ത്യയില് ആദ്യമായി ആഫ്രിക്കന് പന്നിപ്പനി സ്ഥിരീകരിച്ച തവിഞ്ഞാല് കൊളങ്ങോട് മുല്ലപ്പറമ്ബില് എം.വി.
വിന്സെന്റിന്റെ ഫാമിലെ മുഴുവന് പന്നികളെയും കൊന്നു. ഞായറാഴ്ച ഉച്ചയ്ക്ക് രണ്ടേകാലോടെ ആരംഭിച്ച ദൗത്യം 18 മണിക്കൂറുകള്ക്ക് ശേഷം തിങ്കളാഴ്ച രാത്രി ഒമ്ബതോടെയാണ് അവസാനിച്ചത്. ഞായറാഴ്ച കുഴിയെടുക്കാന് കൂടുതല് സമയം വേണ്ടിവന്നതാണ് നടപടി വൈകാന് കാരണം. പന്നികളുടെ ജഡം മറവ് ചെയ്യാന് ഫാമിന് സമീപത്ത് തന്നെയാണ് 30 അടി നീളത്തിലും 20 അടി വീതിയിലും 20 അടി താഴ്ചയിലും കുഴി നിര്മിച്ചത്. കുഴി കുഴിക്കുന്നതിനുള്ള പ്രവര്ത്തനങ്ങള് ഞായറാഴ്ച മൂന്നിന് തുടങ്ങിയെങ്കിലും രാത്രി ഒമ്ബ തോടെയാണ് അവസാനിച്ചത്. കുഴി പൂര്ത്തിയാക്കിയ ശേഷം രാത്രി പത്തോടെയാണ് പന്നികളെ കൊന്നുതുടങ്ങിയത്. ഇത് തിങ്കളാഴ്ച രാവിലെ അഞ്ചുവരെ നീണ്ടു. ഈ സമയത്തിനുള്ളില് 190 പന്നികളെ കൊന്നു. തിങ്കളാഴ്ച ഉച്ച 12 മണിയോടെയാണ് വീണ്ടും പന്നികളെ കൊന്നു തുടങ്ങിയത്. രാത്രി ഒമ്ബത് മണിയോടെ 350 പന്നികളെയും കൊന്ന് സംഘം മടങ്ങി.
ഇലക്ട്രിക് സ്റ്റണ്ണര് ഉപയോഗിച്ച് മയക്കിയ ശേഷം ഞരമ്ബ് മുറിച്ച് ചോര വാര്ത്തൊഴുക്കി കൊല്ലുന്ന ‘ഹ്യുമേന് കില്ലിങ്’ സംവിധാനമാണ് സ്വീകരിച്ചത്. ഈ രീതിയിലൂടെ ആറു മുതല് പത്ത് സെക്കന്റ് വരെയുള്ള സമയത്തിനകം പന്നികള് ചത്തുവീണു. ഫോട്ടോ എടുക്കല്, തൂക്കിനോക്കി ഭാരം നിശ്ചയിക്കല് എന്നിവ കൂടിയുള്ളതിനാലാണ് സമയം പിന്നെയും വൈകിയത്. മറ്റു സംസ്ഥാനങ്ങളില് ഈ രീതി അവലംബിച്ചപ്പോള് ഏകദേശം 80 മുതല് 90 വരെ പന്നികളെയാണ് ഒരുദിവസം കൊന്നിരുന്നത്. ഇതപേക്ഷിച്ച് വളരെ വേഗത്തിലാണ് വയനാട്ടിലെ നടപടി ക്രമങ്ങള് പൂര്ത്തിയായത്.
കാട്ടിക്കുളം വെറ്ററിനറി സര്ജന് ഡോ. വി. ജയേഷ്, മാനന്തവാടി വെറ്ററിനറി പോളിക്ലിനിക്കിലെ ഡോ. കെ. ജവഹര് എന്നിവരുടെ നേതൃത്വത്തിലുള്ള 16 അംഗസംഘമാണ് ദൗത്യം പൂര്ത്തിയാക്കിയത്. ഫാമിന്റെ ഒരു കിലോമീറ്റര് പരിധിയില് ഇവര്ക്ക് താമസ സൗകര്യമൊരുക്കിയിരുന്നു. 24 മണിക്കൂര് ഇവിടെ ക്വാറന്റീനില് കഴിഞ്ഞ ശേഷമാണ് സംഘം മടങ്ങുക. ദൗത്യത്തിന് ശേഷം ഫാമും പരിസരവും അഗ്നിശമന സേന അണുവിമുക്തമാക്കി. മാനന്തവാടി കണിയാരം വലിയകണ്ടിക്കുന്ന് കൊളവയല് ജിനി ഷാജിയുടെ ഫാമിലുള്ള 43 പന്നികളും ആഫ്രിക്കന് പന്നിപ്പനി ബാധിച്ച് ചത്തെന്ന് മൃഗസംരക്ഷണ വകുപ്പ് സ്ഥിരീകരിച്ചിരുന്നു. ഈ ഫാമിന് ഒരുകിലോമീറ്റര് പരിധിയിലുള്ള അഞ്ച് ഫാമുകളിലെ 325 പന്നികളെ കൂടി കൊല്ലാന് തീരുമാനിച്ചിരുന്നു. ജിയോടാഗ് സംവിധാനം ഉപയോഗിച്ച് അളന്നപ്പോള് സമീപത്തുള്ള ഫാമുകളുടെ എണ്ണം കുറഞ്ഞു. നിലവില് മാനന്തവാടിയിലെ 80 പന്നികളെ കൊല്ലാനാണ് തീരുമാനം. ഇതും രണ്ടു ദിവസത്തിനകം ആരംഭിക്കും.