തിരുവനന്തപുരം : വിവിധ പദ്ധതികള്‍ക്കും സ്ഥാപനങ്ങള്‍ക്കും അനുവദിക്കുന്ന വായ്പകളുടെ പലിശ നിരക്ക് വര്‍ദ്ധിപ്പിക്കണമെന്ന് സഹകരണ സ്ഥാപനങ്ങള്‍ സര്‍ക്കാരിനോട് ആവശ്യപ്പെട്ടു.
പലിശ നിരക്ക് 9 മുതല്‍ 9.50 ശതമാനമായി ഉയര്‍ത്തണമെന്നാണ് ആവശ്യം. സ്ഥിതിഗതികള്‍ ചര്‍ച്ച ചെയ്യാന്‍ തിങ്കളാഴ്ച മന്ത്രിതല യോഗം ചേരും.
സാമൂഹ്യസുരക്ഷാ പെന്‍ഷന്‍ കമ്ബനി മുതല്‍ വിഴിഞ്ഞം അന്താരാഷ്ട്ര തുറമുഖ നിര്‍മ്മാണത്തിന് വരെ വിവിധ സ്ഥാപനങ്ങള്‍ ഫണ്ട് സ്വരൂപിക്കാന്‍ സഹകരണ കണ്‍സോര്‍ഷ്യങ്ങളെയാണ് ആശ്രയിക്കുന്നത്. സംസ്ഥാനത്തെ സഹകരണ സ്ഥാപനങ്ങളില്‍ നിലവിലുള്ള 2.50 ലക്ഷം കോടി രൂപയുടെ നിക്ഷേപം വിവിധ വികസന പദ്ധതികള്‍ക്കായി വിനിയോഗിക്കുക എന്ന സര്‍ക്കാര്‍ നയത്തിന് അനുസൃതമായാണ് ഗ്യാരണ്ടീഡ് സഹകരണ സ്ഥാപനങ്ങള്‍ക്ക് സര്‍ക്കാര്‍ വായ്പ അനുവദിക്കുന്നത്. നിലവിലുള്ള 8.50 ശതമാനം പലിശ നിരക്ക് ഒരു ശതമാനമെങ്കിലും വര്‍ദ്ധിപ്പിക്കണമെന്നാണ് സഹകരണ സ്ഥാപനങ്ങളുടെ ആവശ്യം.
സഹകരണ നിക്ഷേപത്തിന്‍റെ പലിശ നിരക്ക് ഫെബ്രുവരിയില്‍ 8.75 ശതമാനമായി ഉയര്‍ത്തിയിരുന്നു. നിക്ഷേപങ്ങള്‍ക്ക് നല്‍കുന്നതിനേക്കാള്‍ പലിശ വായ്പകള്‍ക്ക് ഈടാക്കണമെന്ന നിബന്ധന ചൂണ്ടിക്കാട്ടിയാണ് സഹകരണ സ്ഥാപനങ്ങള്‍ ധനവകുപ്പിനെ സമീപിച്ചത്. സാമൂഹ്യക്ഷേമ പെന്‍ഷന്‍ വിതരണ കമ്ബനിക്ക് 20,000 കോടി രൂപ നല്‍കി. കെ.എസ്.ആര്‍.ടി.സി പെന്‍ഷന്‍ വിതരണത്തിനായി സഹകരണ സ്ഥാപനങ്ങള്‍ പ്രതിമാസം 70 കോടി രൂപ നല്‍കുന്നു. പലിശ നിരക്ക് പരിഷ്കരിക്കണമെന്ന ആവശ്യത്തില്‍ തീരുമാനം അറിഞ്ഞ ശേഷം മാത്രം പെന്‍ഷന്‍ ഫണ്ട് അനുവദിച്ചാല്‍ മതിയെന്നാണ് കണ്‍സോര്‍ഷ്യത്തിന്‍റെ തീരുമാനം. കൊച്ചി മെട്രോ മുതല്‍ വിഴിഞ്ഞം വരെ പണം കടമെടുക്കാനിരിക്കെ പലിശ നിരക്ക് സംബന്ധിച്ച സര്‍ക്കാര്‍ തീരുമാനം നിര്‍ണായകമാണ്.
