പാനൂര്‍: പാനൂര്‍ ടൗണിനെ വീര്‍പ്പുമുട്ടിക്കുന്ന ഗതാഗതക്കുരുക്ക് അഴിക്കാന്‍ ട്രാഫിക് പരിഷ്കരണം ഉള്‍പ്പെടെയുള്ള പദ്ധതിയുമായി വീണ്ടും നഗരസഭയും പൊലീസും രംഗത്ത്.
പല പ്രാവശ്യം ഗതാഗത പരിഷ്കരണം നടപ്പാക്കിയെങ്കിലും ഇതുവരെ വിജയത്തിലെത്തിക്കാനോ തുടര്‍ച്ച ഉറപ്പാക്കാനോ കഴിഞ്ഞിരുന്നില്ല. ഈ സാഹചര്യത്തിലാണ് പരമാവധി ഗൃഹപാഠം ചെയ്ത് നഗരസഭയും പൊലീസും വീണ്ടും പരിഷ്കരണശ്രമം ആരംഭിക്കുന്നത്. ഗതാഗതപരിഷ്കരണം ഇന്നു മുതല്‍ വീണ്ടും നിലവില്‍ വരും. ട്രാഫിക് നിര്‍ദേശങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടിയെടുക്കാനാണ് പൊലീസ് തീരുമാനം.
ഇന്നുമുതല്‍ ഒരാഴ്ച ബോധവത്കരണ യജ്ഞവും നടത്തും. അടുത്താഴ്ച വാഹനം പിടിച്ചെടുക്കുന്നതുള്‍പ്പെടെയുള്ള നടപടിയിലേക്ക് നീങ്ങും. ടാക്സി- സ്വകാര്യ വാഹന പാര്‍ക്കിങ്ങിലും മാറ്റം വരും.
ജനുവരി അവസാനത്തോടെ ടൗണ്‍ ജങ്ഷനില്‍ സിഗ്നല്‍ ലൈറ്റ് സംവിധാനവും നിലവില്‍വരുമെന്ന് നഗരസഭാധ്യക്ഷന്‍ വി.നാസര്‍, ഉപാധ്യക്ഷ പ്രീത അശോകന്‍, പാനൂര്‍ പ്രിന്‍സിപ്പല്‍ എസ്.ഐ സി.സി. ലതീഷ്, നഗരസഭ സ്ഥിരംസമിതി അധ്യക്ഷന്മാരായ കെ.പി. ഹാഷിം, ടി.കെ. ഹനീഫ, ആശിഖ ജുംന എന്നിവര്‍ പറഞ്ഞു. കെ.പി.മോഹനന്‍ മുന്‍കൈ എടുത്താണ് സിഗ്നല്‍ സംവിധാനം നടപ്പാക്കുന്നത്. പ്രവാസി വ്യവസായിയായ കെ. സൈനുല്‍ ആബിദീ‍െന്‍റ സഹകരണത്തില്‍ ജങ്ഷനില്‍ ആധുനിക കാമറ സംവിധാനവും ഒരുക്കിയിട്ടുണ്ട്.
