മസ്കത്ത്: ന്യൂനമര്‍ദത്തെ തുടര്‍ന്ന് രണ്ടു ദിവസം മുമ്ബ് ആരംഭിച്ച മഴ തലസ്ഥാന നഗരിയായ മസ്കത്ത് ഉള്‍പ്പെടെ വിവിധ ഗവര്‍ണറേറ്റുകളില്‍ വെള്ളിയാഴ്ചയും തുടര്‍ന്നു.
കനത്ത കാറ്റി‍െന്‍റയും ഇടിയുടെയും അകമ്ബടിയോടെയായിരുന്നു മഴ കോരിച്ചൊരിഞ്ഞത്. നാശനഷ്ടമൊന്നും റിപ്പോര്‍ട്ട് ചെയ്തിട്ടില്ല.
റോഡുകളില്‍ വെള്ളം കയറി പലയിടത്തും ചെറിയതോതില്‍ ഗതാഗതം തടസ്സപ്പെട്ടു. വാദികള്‍ നിറഞ്ഞുകവിയുന്നതിനാല്‍ മുറിച്ചുകടക്കരുതെന്ന് അധികൃതരുടെ നിര്‍ദേശമുണ്ട്. സുഹാര്‍, ഇബ്ര, ലിവ, ഖാബൂറ, നഖല്‍, ബഹ്ല, അല്‍അവബി, ഖുറിയാത്ത്, യങ്കല്‍, ബുറൈമി എന്നിവിടങ്ങളിലായിരുന്നു മഴ. പലയിടത്തും വെള്ളക്കെട്ടുകളും രൂപപ്പെട്ടിട്ടുണ്ട്. മസ്കത്ത് ഗവര്‍ണറേറ്റില്‍ രാവിലെ മുതല്‍തന്നെ സാമാന്യം നല്ല മഴ ലഭിച്ചു. ഇടിയും അനുഭവപ്പെട്ടു. റൂവി, ഖുറം, അല്‍ ഖുവൈര്‍ ഭാഗങ്ങളില്‍ ഉച്ചയോടെയാണ് ഇടിയോടുകൂടിയ മഴ ലഭിച്ചത്. എന്നാല്‍, അധികനേരം നീണ്ടുനില്‍ക്കാഞ്ഞത് ആശ്വാസമായി. വെള്ളിയാഴ്ച പ്രര്‍ഥനസമയത്ത് പെയ്ത മഴ നമസ്കരിക്കാനെത്തിയവര്‍ക്ക് ബുദ്ധിമുട്ടുണ്ടാക്കി.
കോവിഡ് നിയന്ത്രണംമൂലം പള്ളിക്കകത്ത് പകുതി ആളുകള്‍ക്കേ പ്രാര്‍ഥനക്ക് അവസരമുള്ളൂ. ശേഷിക്കുന്ന ആളുകള്‍ പള്ളിക്കുപുറത്താണ് നമസ്കാരം നിര്‍വഹിക്കാറ്. രാവിലെ പ്രസന്നമായ കാലാവസ്ഥ അനുഭവപ്പെട്ടതിനാല്‍ ബീച്ചുകളില്‍ ഒട്ടേറെ ആളുകളെത്തി. എന്നാല്‍, മിക്കയിടത്തും കടല്‍ പ്രക്ഷുബ്ധമായതിനാല്‍ ഇറങ്ങാന്‍ സുരക്ഷ ജീവനക്കാര്‍ അനുവദിച്ചില്ല. അപകട ഭീതിയെ തുടര്‍ന്ന് വാഹന വേഗം നിയന്ത്രിക്കണമെന്ന ആര്‍.ഒ.പിയുടെ മുന്നറിയിപ്പുണ്ട്.
