കൊച്ചി: നടനും നിര്മാതാവുമായ വിജയ് ബാബുവിനെതിരായ ബലാത്സംഗ പരാതിയുടെ പശ്ചാത്തലത്തില് നടി റിമ കല്ലിങ്കല് പങ്കുവെച്ച കാര്ട്ടൂണ് വൈറലായി.
അതിജീവിതക്ക് പിന്തുണയുമായാണ് റിമ കല്ലിങ്കല് കാര്ട്ടൂണ് പങ്കുവെച്ചത്. ഊളബാബു എന്ന കാര്ട്ടൂണാണ് റിമ സോഷ്യല് മീഡിയയിലൂടെ പങ്കുവെച്ചത്.
‘ഇതാണ് ഊളബാബു, ഊളബാബു അതിജീവിതയോട് സ്വഭാവ സര്ട്ടിഫിക്കറ്റ് ആവശ്യപ്പെടുകയാണ്, ഊളബാബുവിനെ പോലെയാവരുത്,’ എന്നാണ് റിമ പങ്കുവെച്ച പോസ്റ്റിലുള്ളത്. നിരവധി പ്രമുഖരാണ് ഊളബാബു എന്ന് പേരിട്ട കാര്ട്ടൂണ് ഇന്നലെ ഷെയര് ചെയ്തത്.
അതേസമയം, വിജയ് ബാബു ദുബായില് ആണെന്ന് സ്ഥിരീകരിച്ചു. ഈ മാസം 24 നാണ് ബംഗളൂരുവില് നിന്നാണ് വിജയ് ബാബു ദുബായിലേക്ക് കടന്നത്.
നടനും നിര്മാതാവുമായ വിജയ് ബാബുവിനെതിരായ പീഡനക്കേസില് കൂടുതല് തെളിവുകള് ലഭിച്ചിട്ടുണ്ട്. ചലച്ചിത്ര പ്രവര്ത്തകര് അടക്കം എട്ടുപേരുടെ മൊഴി എടുത്തിട്ടുണ്ട്. സി.സി.ടി.വി ഉള്പ്പെടെയുള്ള തെളിവുകളും ലഭിച്ചിട്ടുണ്ട്. പരാതിക്കാരിയുമായി വിജയ് ബാബു ഹോട്ടലില് എത്തിയതിനും തെളിവുകള് ലഭിച്ചു. ഹോട്ടല് ജീവനക്കാരുടെ മൊഴി രേഖപ്പെടുത്തി. നടന് മുന്നില് മറ്റ് വഴികളില്ലെന്നും കീഴടങ്ങുമെന്നാണ് പ്രതീക്ഷയെന്ന് സിറ്റി പൊലീസ് കമീഷണര് സി.എച്ച്. നാഗരാജു പറഞ്ഞു.
നടനും പരാതിക്കാരിയായ നടിയും കൊച്ചിയിലെ ആഡംബര ഹോട്ടലില് എത്തിയതിന്റെ സി.സി.ടി.വി ദൃശ്യങ്ങള് പൊലീസിന് ലഭിച്ചു. കൊച്ചി പനമ്ബള്ളി നഗറിലെ ആഡംബര ഹോട്ടലില് നിന്നാണ് നിര്ണായകമായ സി.സി.ടി.വി ദൃശ്യങ്ങള് പൊലീസിന് ലഭിച്ചു. കഴിഞ്ഞ മാര്ച്ച് 13 മുതല് ഏപ്രില് 14 വരെയുള്ള തീയതികളില് അഞ്ച് സ്ഥലത്ത് തന്നെ വിജയ് ബാബു കൊണ്ടുപോയി എന്നാണ് പരാതിക്കാരിയുടെ മൊഴിയിലുള്ളത്.