കല്‍പറ്റ: കോഴിക്കോട് മെഡിക്കല്‍ കോളജ് ആശുപത്രിക്ക് സമീപം ദുരൂഹ സാഹചര്യത്തില്‍ മരിച്ച കല്‍പറ്റ അഡലെയ്ഡ് കോളനിയിലെ വിശ്വനാഥന്റെ മരണവുമായി ബന്ധപ്പെട്ട് പൊലീസ് സമർപ്പിച്ച അന്വേഷണ റിപ്പോർട്ട് തൃപ്തികരമല്ലെന്ന് മുൻമന്ത്രി പി.കെ.
ജയലക്ഷ്മി. ആദിവാസി കോണ്‍ഗ്രസ് സംസ്ഥാന സെക്രട്ടറി മീനാക്ഷി രാമൻ, കോണ്‍ഗ്രസ് ഭാരവാഹികളായ ജോഷി, ജോണ്‍ എന്നിവർക്കൊപ്പം വിശ്വനാഥന്റെ ഭാര്യയെയും മറ്റു കുടുംബാംഗങ്ങളെയും സന്ദർശിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു അവർ. വിശ്വനാഥന്റെ മരണത്തിനുശേഷം വീട് സന്ദർശിച്ച പട്ടികജാതി-വർഗ കമീഷൻ സർക്കാറിന് നല്‍കിയ ശിപാർശകള്‍ സർക്കാർ പരിഗണിക്കണം. ഭാര്യ ബിന്ദുവിന് സർക്കാർ ജോലി നല്‍കണം. കുടുംബത്തിന് അർഹമായ സാമ്ബത്തിക സഹായം നല്‍കണം. സംഭവവുമായി ബന്ധപ്പെട്ട മുഴുവൻ പ്രതികളെയും വെളിച്ചത്തു കൊണ്ടുവരണം തുടങ്ങിയ ആവശ്യങ്ങളും ഇവർ ഉന്നയിച്ചു.
