തിരൂർ: രഹസ്യ വിവരത്തെത്തുടർന്ന് എക്സൈസ്, ആർ.പി.എഫ് സംഘം നടത്തിയ പരിശോധനയില്‍ കണ്ണൂർ-യശ്വന്ത്പുരം എക്‌സ്പ്രസില്‍നിന്ന് 21 കിലോ കഞ്ചാവ് പിടികൂടി.
തിരൂർ റെയില്‍വേ സ്റ്റേഷനിലെത്തിയപ്പോഴാണ് കണ്ണൂർ-യശ്വന്ത്പുരം എക്‌സ്പ്രസിന്റെ ജനറല്‍ കംപാർട്ട്മെന്റില്‍നിന്ന് കഞ്ചാവ് പിടികൂടിയത്.
വെള്ളിയാഴ്ച രാവിലെ ഏഴിനാണ് ട്രെയിനിലെ ജനറല്‍ കംപാർട്ട്മെന്റില്‍നിന്ന് കഞ്ചാവ് കണ്ടെത്തിയത്. സംശയകരമായ നിലയില്‍ കണ്ട ബാഗ് പരിശോധിച്ചതോടെയാണ് കഞ്ചാവ് ലഭിച്ചത്. 18 ചെറിയ പൊതികളാക്കിയാണ് കഞ്ചാവ് ഒളിപ്പിച്ചിരുന്നത്. ബംഗളൂരുവില്‍നിന്ന് കേരളത്തിലേക്ക് കടത്തിക്കൊണ്ടുവന്ന കഞ്ചാവാണിതെന്ന് അധികൃതർ പറഞ്ഞു. ആർ.പി.എഫ് എ.എസ്.ഐ സുനില്‍, എക്സൈസ് സി.ഐ അജയകുമാർ എന്നിവരുടെ നേതൃത്വത്തിലായിരുന്നു പരിശോധന നടത്തിയത്.
