കൊല്ക്കത്ത: അധ്യാപക നിയമന അഴിമതി കേസില് പശ്ചിമബംഗാള് മന്ത്രി പാര്ഥ ചാറ്റര്ജി അറസ്റ്റിലായതിന് പിന്നാലെ പ്രതികരണവുമായി മുഖ്യമന്ത്രി മമത ബാനര്ജി.
അഴിമതിയെ ഒരുതരത്തിലും പിന്തുണക്കില്ലെന്ന് മമത വ്യക്തമാക്കി.
അതേസമയം, അറസ്റ്റിലായ മന്ത്രി പാര്ഥ ചാറ്റര്ജിയെ ചികില്സക്കായി ഭുവനേശ്വര് എയിംസിലേക്ക് മാറ്റി. കൊല്ക്കത്ത ഹൈകോടതി നിര്ദേശപ്രകാരമാണ് സര്ക്കാര് ആശുപത്രിയില് നിന്ന് എയിംസിലേക്ക് മാറ്റിയത്. എന്ഫോഴ്സ്മെന്റ് ഡയറക്ടറേറ്റിന്റെ ഹര്ജിയിലാണ് നടപടി.
സ്കൂള് അധ്യാപക നിയമന അഴിമതി കേസിലാണ് തൃണമൂല് കോണ്ഗ്രസ് സെക്രട്ടറി ജനറലും പശ്ചിമ ബാംഗാള് വാണിജ്യ വ്യവസായ മന്ത്രിയുമായ പാര്ഥ ചാറ്റര്ജിയെ സാമ്ബത്തിക കുറ്റാന്വേഷണ വിഭാഗം (ഇ.ഡി) അറസ്റ്റ് ചെയ്തത്. 2014-21 കാലയളവില് ചാറ്റര്ജി വിദ്യാഭ്യാസ മന്ത്രിയായിരിക്കുമ്ബോഴാണ് അഴിമതി ആരോപണം ഉയര്ന്നത്. വെള്ളിയാഴ്ച ഇ.ഡി നടത്തിയ പരിശോധനയില് ചാറ്റര്ജിയുടെ കൂട്ടാളിയും മോഡല് അര്പ്പിത മുഖര്ജിയുടെ വസതിയില് നിന്ന് 21 കോടി രൂപ പിടിച്ചെടുത്തിരുന്നു.