ദുബൈ: ഈ വര്ഷം ഇതുവരെ ദുബൈ പൊലീസ് പിടിച്ചെടുത്തത് 22 ലക്ഷം മസാജ് കാര്ഡുകള്. കാര്ഡുകള് അച്ചടിച്ച് വിതരണം ചെയ്ത 66 പേരെ അറസ്റ്റ് ചെയ്തു.
അനധികൃത മസാജ് സെന്ററുകള്ക്കെതിരായ ഓപറേഷന്റെ ഭാഗമാണ് നടപടി. കഴിഞ്ഞ വര്ഷം 37 ലക്ഷം കാര്ഡുകള് പിടിച്ചിരുന്നു. 243 പേരെയാണ് അറസ്റ്റ് ചെയ്തത്. ഒന്നര വര്ഷത്തിനിടെ ആകെ 59 ലക്ഷം കാര്ഡുകളാണ് പിടിച്ചത്. ഇതില് രേഖപ്പെടുത്തിയിരുന്ന 919 ഫോണ് നമ്ബറുകള് വിച്ഛേദിച്ചു. മസാജ് പാര്ലറുകളുമായി ബന്ധപ്പെട്ട് 879 പേരെയാണ് ആകെ അറസ്റ്റ് ചെയ്തത്. ഇതില് 588 പേരും പിടിയിലായത് പൊതുസമൂഹത്തിന്റെ ധാര്മികതക്ക് നിരക്കാത്ത പ്രവൃത്തികള് ചെയ്തതിനാണ്.
ലൈസന്സില്ലാതെ പ്രവര്ത്തിക്കുന്ന മസാജ് സെന്ററുകളില് പോകുന്നവര്ക്കും പൊലീസ് മുന്നറിയിപ്പ് നല്കി. വ്യാജ സമൂഹ മാധ്യമ അക്കൗണ്ടുകളിലൂടെയാണ് ഇരകളെ ആകര്ഷിക്കുന്നതെന്ന് ബര്ദുബൈ പൊലീസ് സ്റ്റേഷന് ഡയറക്ടര് ബ്രിഗേഡിയര് അബ്ദുല്ല ഖാദിം സുറൂര് അല് മഅസെം പറഞ്ഞു. മസാജ് സെന്ററിലെത്തിയ ഉടന് ഒരു കൂട്ടം ആഫ്രിക്കന് സ്വദേശികള് ഇരയെ വളയുകയും നഗ്നചിത്രങ്ങള് പകര്ത്തുകയും ചെയ്യും. പിന്നീട് ഈ ചിത്രങ്ങളുപയോഗിച്ച് ബ്ലാക്ക് മെയില് ചെയ്യുമെന്നും ഉദാഹരണം സഹിതം അദ്ദേഹം വ്യക്തമാക്കി.
ഇത്തരം സ്ഥാപനങ്ങള്ക്കെതിരെ മുന്നറിയിപ്പ് നല്കുന്നതിന്റെ ഭാഗമായി റിയല് എസ്റ്റേറ്റ് കമ്ബനികള്ക്ക് 600ഓളം ബോധവത്കരണ ബ്രോഷറുകളും എസ്.എം.എസുകളും അയച്ചു. ഇത് 8007 സ്ഥാപനങ്ങളിലേക്കും 53,816 ജീവനക്കാരിലേക്കും എത്തി. അനധികൃത മസാജ് പാര്ലറുകളെ കുറിച്ച് വിവരം ലഭിക്കുന്നവര് 901 എന്ന നമ്ബറിലോ ‘പൊലീസ് എയ്’ സേവനം വഴിയോ വിവരം അറിയിക്കണമെന്ന് ബ്രിഗേഡിയര് അല് മഅസെം പറഞ്ഞു. ലൈസന്സുള്ള മസാജ് സെന്ററുകള് ദുബൈ ഇക്കണോമിക് ആന്ഡ് ടൂറിസം വകുപ്പില് രജിസ്റ്റര് ചെയ്തിരിക്കുമെന്നും ഉപഭോക്താക്കള് ഇക്കാര്യം ഉറപ്പാക്കണമെന്നും അദ്ദേഹം ഓര്മിപ്പിച്ചു.