ഈ സര്വേയ്ക്കുശേഷം സംസ്ഥാന സര്ക്കാര് പുതിയ മദ്റസകളെ അംഗീകരിക്കുന്നതിനുള്ള നടപടികള് ആരംഭിക്കുമോയെന്ന ചോദ്യത്തിന്, നിലവില് അംഗീകാരമില്ലാത്ത മദ്റസകളുടെ വിവരങ്ങള് മാത്രം ശേഖരിക്കുകയാണ് സര്ക്കാരിന്റെ ലക്ഷ്യമെന്ന് മന്ത്രി പറഞ്ഞു. നിലവില് ഉത്തര്പ്രദേശില് ആകെ 16,461 മദ്റസകളാണ് പ്രവര്ത്തിക്കുന്നത്. ഇതില് 560 എണ്ണത്തിന് സര്ക്കാര് ഗ്രാന്റ് നല്കുന്നുണ്ട്. സംസ്ഥാനത്ത് കഴിഞ്ഞ ആറ് വര്ഷമായി പുതിയ മദ്റസകള് ഗ്രാന്റ് ലിസ്റ്റില് ഉള്പ്പെട്ടിട്ടില്ല.
‘കെട്ടിടം തകര്ച്ചയിലാണെന്നും ആളുകള്ക്ക് കഴിയാന് സുരക്ഷിതമല്ലെ’ന്നും ചൂണ്ടിക്കാട്ടിയാണ് കഴിഞ്ഞ ദിവസം അസമിലെ ബൊംഗായ്ഗാവില് മദ്റസ തകര്ത്തത്. തീവ്രവാദ സംഘടനകള്ക്ക് മതസ്ഥാപനങ്ങളുമായി ബന്ധമുണ്ടെന്ന് മുഖ്യമന്ത്രി ഹിമന്ത ബിശ്വ ശര്മ ആരോപിച്ചതിന് പിന്നാലെയാണ് ഒരു മാസത്തിനിടെ മൂന്ന് മദ്റസകള് തകര്ത്തത്.
അതിനിടെ, മദ്റസകളില് ആശ്രിത ക്വാട്ടയില് നിയമനം നടത്താന് മാനേജ്മെന്റ് കമ്മിറ്റിക്ക് പുറമേ പ്രിന്സിപ്പലിനും ജില്ലാ ന്യൂനപക്ഷ ക്ഷേമ ഓഫിസര്ക്കും അധികാരം നല്കുന്ന ഉത്തരവും ബുധനാഴ്ച യു.പി സര്ക്കാര് പുറത്തിറക്കിയിരുന്നു. എയ്ഡഡ് മദ്റസകളിലെ അധ്യാപക, അനധ്യാപക ജീവനക്കാര്ക്ക് ബന്ധപ്പെട്ട മദ്റസ മാനേജര്മാരുടെ സമ്മതത്തോടെയും സംസ്ഥാന മദ്റസാ വിദ്യാഭ്യാസ കൗണ്സില് രജിസ്ട്രാറുടെ അംഗീകാരത്തോടെയും സ്ഥലം മാറ്റാമെന്ന് അന്സാരി പറഞ്ഞു. വനിതാ ജീവനക്കാര്ക്ക് ചട്ടപ്രകാരം പ്രസവാവധി, ശിശു സംരക്ഷണ അവധി എന്നിവ ലഭിക്കും.