സ്ത്രീകള്‍ക്കും കുട്ടികള്‍ക്കുമെതിരായ അതിക്രമ പരാതികളില്‍ ഉടന്‍ നടപടി വേണമെന്ന് സംസ്ഥാന പൊലീസ് മേധാവി അനില്‍ കാന്ത്.
പോക്സോ കേസുകളുടെ അന്വേഷണത്തില്‍ കാലതാമസം ഒഴിവാക്കണം. പൊതുജനങ്ങളോട് മാന്യമായി പെരുമാറണമെന്നും ഉന്നത പൊലീസ് ഉദ്യോഗസ്ഥരുടെ യോഗത്തില്‍ ഡിജിപി നിര്‍ദ്ദേശിച്ചു.
ഓണ്‍ലൈനില്‍ നിന്ന് ലഭിക്കുന്ന പരാതികളില്‍ ഫലപ്രദമായ നടപടി സ്വീകരിക്കണം. പൊലീസിന്റെ പ്രവര്‍ത്തനത്തില്‍ ജില്ലാ പൊലീസ് മേധാവിമാര്‍ക്ക് പ്രധാന പങ്ക് വഹിക്കാനുണ്ടെന്നും അനില്‍കാന്ത് വ്യക്തമാക്കി. കൊവിഡ് വ്യാപനത്തിനു ശേഷം ആദ്യമായാണ് മുതിര്‍ന്ന പൊലീസുദ്യോഗസ്ഥര്‍ പങ്കെടുക്കുന്ന ഉന്നതല യോഗം പൊലീസ് ആസ്ഥാനത്ത് ചേരുന്നത്.
കേരള പൊലീസിനെതിരെ അടുത്തിടെയായി വന്ന നിരന്തര വിവാദങ്ങളുടെ പശ്ചാത്തലത്തിലാണ് എസ്പി റാങ്ക് മുതല്‍ മുകളിലേക്കുള്ള ഉദ്യോഗസ്ഥരുടെ പ്രത്യേക യോഗം വിളിച്ചു ചേര്‍ത്തത്. കോടതിയുടെ ഭാഗത്ത് നിന്നുള്‍പ്പെടെ പൊലീസിനെതിരെ വിമര്‍ശനമുണ്ടായ സാഹചര്യത്തിലാണ് യോഗം. മോന്‍സന്‍ മാവുങ്കല്‍ കേസ്, പിങ്ക് പൊലീസ് ഉദ്യോഗസ്ഥ പെണ്‍കുട്ടിയോട് മോശമായി പെരുമാറിയ സംഭവം എന്നീ വിഷയങ്ങളില്‍ കോടതി പൊലീസിനെ നിശിതമായി വിമര്‍ശിച്ചിരുന്നു.
