ന്യൂഡല്ഹി: രാജ്യത്തെത്തുന്ന ഇന്റർ നാഷണൽ യാത്രക്കാര്ക്ക് ആര് ടി പി സി ആര് പ്രീ ബുക്കിംഗ് നിര്ബന്ധമാക്കി കേന്ദ്രം . ഡല്ഹി, മുംബൈ, ചെന്നൈ, കൊല്ക്കത്ത, ബെംഗളൂരു വിമാനത്താവളങ്ങളില് എത്തുന്നവര് പരിശോധനക്ക് മുൻകൂട്ടി ബുക്ക് ചെയ്യേണ്ടതുണ്ട് .
ഹൈ റിസ്ക് രാജ്യങ്ങളില് നിന്നെത്തുന്നവരും 14 ദിവസത്തിനുള്ളിൽ ഹൈ റിസ്ക് രാജ്യങ്ങൾ സന്ദർശിച്ചവരും ആര് ടി പി സി ആര് പരിശോധനക്ക് വിധേയമാകുന്നതിനായി പരിശോധന എയർ സുവിധ പോർട്ടലിൽ മുന്കൂട്ടി ബുക്ക് ചെയ്യണമെന്ന് വ്യോമയാന മന്ത്രാലയം അറിയിച്ചു .
അപകട സാധ്യതകൂടിയ രാജ്യത്തുനിന്ന് ഈ വിമാനത്താവളങ്ങളിൽ എത്തുന്ന യാത്രക്കാര് പരിശോധനക്ക് ബുക്ക് ചെയ്തിട്ടുണ്ട് എന്ന് ഉറപ്പുവരുത്തുന്നതിന് സിവില് വ്യോമയാന ഡയറക്ടറേറ്റ് വിമാന കമ്പനികള്ക്ക് നിര്ദേശം നല്കണം.
മുന്കൂട്ടി ബുക്ക് ചെയ്യുന്നതിന് യാത്രക്കാര്ക്ക് ബുദ്ധിമുട്ടുണ്ടായാല് അവര്ക്ക് യാത്രാനുമതി നിഷേധിക്കാന് പാടില്ല. അത്തരം യാത്രക്കാരെ യാത്രക്ക് ശേഷം വിമാനത്താവളങ്ങളില് സജ്ജീകരിച്ച പരിശോധന കേന്ദ്രങ്ങളിലേക്ക് എത്തിക്കുന്നതിന് വിമാന കമ്പനികള് ആവശ്യമായ നടപടി സ്വീകരിക്കണമെന്നും മന്ത്രാലയം പുറത്തിറക്കിയ ഉത്തരവിൽ വ്യക്തമാക്കി.
എയർ സുവിധ പോർട്ടൽ ഈമാസം 20 മുതല് ഉത്തരവ് പ്രാബല്യത്തില് വരും.