ന്യൂഡല്ഹി: കോണ്ഗ്രസിനെ അധികാരത്തില് നിന്ന് പുറത്താക്കി 2014 മേയ് 26 ന് കേന്ദ്ര ഭരണം ഏറ്റെടുത്ത നരേന്ദ്രമോദി സര്ക്കാരിന് ഇന്ന് എട്ട് വയസ്.
ആദ്യടേമില് അഞ്ച് വര്ഷം പൂര്ത്തിയാക്കിയ മോദി സര്ക്കാര് 2019 ല് വീണ്ടും തിരഞ്ഞെടുപ്പ് നേരിട്ട് അധികാരം നിലനിര്ത്തിയത് ബി.ജെ.പി തനിച്ച് ഭൂരിപക്ഷം നേടിയാണ്. 2014 നേക്കാള് 21 സീറ്റ് കൂടുതല് നേടി. മൊത്തം 303 സീറ്റ്.
ഗുജറാത്ത് കലാപത്തിന്റെ ദുഷ്പേരില് നിന്ന് വികാസ് പുരുഷനെന്ന ദേശീയ പ്രതിഛായയും കടന്ന് രാജ്യത്തിന്റെ യശസ് ഉയര്ത്തിയ ലോകനേതാവെന്ന കീര്ത്തിയിലാണ് ഇപ്പോള് പ്രധാനമന്ത്രി നരേന്ദ്ര മോദി.
ജന്ധന് അക്കൗണ്ട് മുതല് സ്മാര്ട്ട് സിറ്റി മിഷന് വരെ എത്തി നില്ക്കുന്ന മോദി സര്ക്കാരിന്റെ പദ്ധതികള് സാമ്ബത്തിക, ആരോഗ്യ, സാമൂഹ്യ സുരക്ഷാ മേഖലകളില് ജനങ്ങള്ക്ക് നേരിട്ട് പ്രയോജനം ലഭിക്കുന്നവയാണ്. ഇന്ത്യയുടെ ഭരണം രണ്ടാം വട്ടവും ജനങ്ങള് മോദിയെ ഏല്പിക്കാന് കാരണവും ഇത് തന്നെയെന്ന് നിരീക്ഷകര് ചൂണ്ടിക്കാട്ടുന്നു. ഒപ്പം ഹിന്ദുത്വ രാഷ്ട്രീയം ഫലപ്രദമായി ഉപയോഗപ്പെടുത്തിയ മോദി – ഷാ കൂട്ടുകെട്ടും, പാര്ട്ടിയും സര്ക്കാരും ഒരു മെയ്യായി പ്രവര്ത്തിച്ചതും നേട്ടമായി.
ഈ നേട്ടങ്ങള്ക്കെല്ലാം ഇടയിലും പൗരത്വ നിയമ സമരകാലത്തെ ഡല്ഹി കലാപവും കര്ഷക പ്രക്ഷോഭവും ഡീസല് – പെട്രോള് വില വര്ദ്ധനവും രാജ്യത്തെ വിദ്വേഷ പ്രചരണങ്ങളും ജഹാംഗീര് പുരി സംഘര്ഷവുമൊക്കെ മോദി സര്ക്കാരിന്റെ പ്രയാണത്തില് കരിനിഴല് വീഴ്ത്തി.
ഇന്ന് മുതല് ജൂണ് 15 വരെ വന് പ്രചാരണ പരിപാടികളാണ് എട്ടാം വാര്ഷികത്തിന്റെ ഭാഗമായി ബി.ജെ.പി സംഘടിപ്പിക്കുന്നത്. സേവ, സുശാസന്, ഗരീബ് കല്യാണ് എന്ന മുദ്രാവാക്യമുയര്ത്തി രാജ്യം മുഴുവന് പാര്ട്ടി പ്രവര്ത്തകര് മുതല് മന്ത്രിമാര് വരെ പ്രചാരണത്തിനിറങ്ങും.
2024ല് ഹാട്രിക്, ബി. ജെ. പി വമ്ബന് ജനസമ്ബര്ക്കത്തിന്
ന്യൂഡല്ഹി:സേവനം, സദ്ഭരണം, പാവപ്പെട്ടവരുടെ ക്ഷേമം. നരേന്ദ്ര മോദി സര്ക്കാരിന്റെ എട്ടാം വാര്ഷികത്തിന്റെ ഭാഗമായി ബി.ജെ.പി ഇന്ന് മുതല് ജൂണ് 15 വരെ നടത്തുന്ന ബൃഹത്തായ ജനസമ്ബര്ക്ക പരിപാടിയുടെ മുദ്രാവാക്യമാണിത്. അടുത്ത സര്ക്കാര് മോദി സര്ക്കാര് എന്ന മുദ്രാവാക്യവുമായി 2014 ലെ തിരഞ്ഞെടുപ്പിനെ നേരിട്ട ബി.ജെ.പി വലിയ വികസന സ്വപ്നങ്ങളാണ് ജനങ്ങളുടെ മുമ്ബില് വച്ചത്.
അധികാരത്തിലേറി ആദ്യ സ്വാതന്ത്ര്യദിനത്തില് ചെങ്കോട്ടയില് ജന് ധന് യോജന പ്രഖ്യാപിച്ച് തുടങ്ങിയ പദ്ധതികള് ആയുഷ്മാന് ഭാരത്, ഉജ്വല യോജന, കിസാന് സമ്മാന് നിധി, പ്രധാനമന്ത്രി ജീവന് ജ്യോതി ബീമ യോജന, പ്രധാന മന്ത്രി സുരക്ഷാ യോജന, അടല് പെന്ഷന് യോജന, പ്രധാനമന്ത്രി ആവാസ് യോജന, സ്വച്ഛ് ഭാരത്, മുദ്രയോജന എന്നിവയിലൂടെ ജനഹൃദയം കീഴടക്കിയെന്ന് 2019ലെ തിരഞ്ഞെടുപ്പ് തെളിയിച്ചു.
8 ഭാഗ്യ നമ്ബര്
മോദിയുടെ ഭാഗ്യ നമ്ബറായാണ് 8 നെ വിശേഷിപ്പിക്കാറ്. 2014ലെ തിരഞ്ഞെടുപ്പ് പ്രാചരണം തുടങ്ങിയത് മാര്ച്ച് 26ന്. 26 ലെ രണ്ടും ആറും കൂട്ടിയാല് 8. 2014 മേയ് 26നാണ് പ്രധാനമന്ത്രിയായി സത്യപ്രതിജ്ഞ ചെയ്തത്. നോട്ട് നിരോധനം നവം. 8 ന്. 20l9 ആഗസ്റ്റ് 8 ന് കാശ്മീരിന്റെ പ്രത്യേക പദവി റദ്ദാക്കി. ലോക്ക് ഡൗണ് പ്രഖ്യാപനം രാത്രി 8 മണിക്ക്. മോദിയുടെ ജനന തീയതി സെപ്റ്റംബര് 17.
ലക്ഷ്യം 2024
2024 ലെ ലോക്സഭാ തിരഞ്ഞെടുപ്പിലൂടെ ഹാട്രിക് വിജയമാണ് ബി. ജെ. പി ഉന്നമിടുന്നത് . മോദി സര്ക്കാരിന്റെ ജനക്ഷേമ പദ്ധതികളും നേട്ടങ്ങളും ജനങ്ങളിലെത്തിക്കും. ഇതിനായി ജില്ലാ - സംസ്ഥാന തലങ്ങളില് മൂന്നംഗ കമ്മിറ്റികള് രൂപീകരിച്ചു. പ്രചരണ ഗാനങ്ങള്, പോക്കറ്റ് ഡയറികള്, വെബ്സൈറ്റുകള് റെഡി. മന്ത്രിമാരും എം.പിമാരും ഗ്രാമങ്ങളില് ബൂത്തുകള് മുതല് പ്രചാരണം നയിക്കും. സംസ്ഥാനങ്ങളില് പ്രചാരണത്തിന് പോകുന്ന കേന്ദ്രമന്ത്രിമാരുമായി ദേശീയ അദ്ധ്യക്ഷന് ജെ.പി നഡ്ഢ മുഖാമുഖം തുടങ്ങി.
ബംഗാളില് ധര്മ്മേന്ദ്ര പ്രധാന്, ജ്യോതിരാദിത്യ സിന്ധ്യ, സ്മൃതി ഇറാനി എന്നിവരും പഞ്ചാബില് മന്സൂഖ് മാണ്ഡവ്യയും നേതൃത്വം നല്കും. ന്യൂനപക്ഷങ്ങളെയും ദുര്ബ്ബല വിഭാഗങ്ങളെയും ലക്ഷ്യമിട്ടും പ്രചാരണമുണ്ടാകും. ജൂണ് 6 മുതല് 8 വരെ ന്യൂനപക്ഷങ്ങളുമായി സമ്ബര്ക്കം. ജൂണ് 1 മുതല് 13 വരെ ഗരീബ് കല്യാണ് സഭകള്. ജൂണ് 3 മുതല് 5 വരെ ഝാര്ഖണ്ഡില് വിശ്വാസ് റാലിയും ആദിവാസി മേളയും.
ജൂണ് 7 മുതല് 13 വരെ യുവമോര്ച്ചയുടെ വികാസ് തീര്ത്ഥ് ബൈക്ക് റാലികളില് മന്ത്രിമാരും എം.പി, എം.എല്.എമാരും നേതാക്കളും പങ്കെടുക്കും. ജനസമ്ബര്ക്ക പരിപാടിയില് സര്ക്കാരിന്റെ റിപ്പോര്ട്ട് കാര്ഡും പുറത്തിറക്കും.
നാളെ പ്രധാനമന്ത്രി ഹിമാചല് പ്രദേശിലെ ഷിംലയില് റോഡ് ഷോയില് പങ്കെടുക്കും. കൊവിഡ് അനാഥരാക്കിയ കുട്ടികള്ക്കുള്ള സഹായ ധനം ഇന്ന് പ്രധാനമന്ത്രി വിതരണം ചെയ്യും. അവര്ക്കുള്ള സ്കോളര്ഷിപ്പും പ്രഖ്യാപിക്കും.