നീലേശ്വരം: ഏറെ പ്രതീക്ഷയോടെ കടയുടെ പൂട്ടുപൊളിച്ച് അകത്തുകടന്ന കള്ളനെ തോല്പിച്ച് സ്ഥാപന ഉടമ. കട മുഴുവനും മൊത്തം അരിച്ചുപെറുക്കിയിട്ടും കള്ളന് ആകെ കിട്ടിയത് വെറും 130 രൂപ മാത്രം.
നിരാശനായ മോഷ്ടാവ് ആ പണം അവിടെത്തന്നെ ഉപേക്ഷിച്ച് മടങ്ങി.
വെള്ളരിക്കുണ്ട് കൂരാംകുണ്ടിലെ പാലാ കോണ്ക്രീറ്റ് എന്ന സ്ഥാപനത്തിന്റെ ഓഫിസിന്റെ പൂട്ട് പൊളിച്ചാണ് കള്ളന് ഉള്ളില് കയറിയത്. ഷെല്ഫും മേശവലിപ്പും മൊത്തം വാരിവലിച്ചിട്ടു നോക്കിയിട്ടാണ് 130 രൂപ കിട്ടിയത്. കള്ളന് പക്ഷേ അതെടുക്കാനുള്ള മനസ്സുവന്നില്ല, ആ പണം അവിടെത്തന്നെവെച്ച് സ്ഥലംവിട്ടു.
രാവിലെ സ്ഥാപനം തുറക്കാനെത്തിയ രാജീവന് എന്ന തൊഴിലാളിയാണ് ഓഫീസിന്റെ പൂട്ട് പൊളിച്ച നിലയില് കണ്ടെത്തിയത്. ഉടനെ പോലീസില് വിവരമറിയിച്ചു. വെള്ളരിക്കുണ്ട് പോലീസ് സ്ഥലത്തെത്തി പ്രാഥമിക പരിശോധന നടത്തി. പണമോ മറ്റു സാധനങ്ങളോ നഷ്ടപ്പെട്ടിട്ടില്ലെന്ന് അന്വേഷണത്തില് വ്യക്തമായി.