ഡല്ഹിയില് കേന്ദ്ര ആരോഗ്യ മന്ത്രാലയത്തിന്റെയും ന്യൂഡല്ഹി എയിംസിലെ സെന്റര് ഫോര് ദന്തല് എഡ്യൂക്കേഷന് ആന്റ് റിസര്ച്ചുിന്റെയും നേത്യത്വത്തില് സംഘടിപ്പിച്ച നാഷണല് ഓറല് ഹെല്ത്ത് പ്രോഗ്രാം ദേശീയ അവലോകന യോഗത്തില് കേരളത്തിന് അഭിനന്ദനം.
യോഗം ദന്താരോഗ്യ രംഗത്ത് കേരളത്തില് വലിയ മാറ്റമാണ് ഉണ്ടായിക്കൊണ്ടിരിക്കുന്നതെന്ന് വിലയിരുത്തി. സംസ്ഥാനം നടപ്പിലാക്കുന്ന ദന്താരോഗ്യ പദ്ധതികളായ മന്ദഹാസം, പുഞ്ചിരി, വെളിച്ചം, ദീപ്തം തുടങ്ങിയവ രാജ്യത്താകെ മാതൃകയായി.
ഈ ദേശീയ അഭിനന്ദനം സംസ്ഥാനം ദന്താരോഗ്യ മേഖലയ്ക്ക് നല്കുന്ന പ്രാധാന്യത്തിനുള്ള അംഗീകാരമാണെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. ദന്തല് ചികിത്സാ രംഗത്ത് കേരളത്തെ ഹബ്ബാക്കി മാറ്റാനുള്ള പ്രവര്ത്തനങ്ങളാണ് നടന്നു വരുന്നത്. കോട്ടയം ദന്തല് കോളേജില് അടുത്തിടെ അഡ്മിനിസ്ട്രേറ്റീവ് & റിസര്ച്ച് ബ്ലോക്ക് യാഥാര്ത്ഥ്യമാക്കി. തെരഞ്ഞെടുക്കപ്പെട്ട കുടുംബാരോഗ്യ കേന്ദ്രങ്ങള് മുതല് മെഡിക്കല് കോളേജുകള് വരെയുള്ള ആശുപത്രികളില് ദന്തല് ചികിത്സ ലഭ്യമാണ്. എല്ലാ താലൂക്ക് ആശുപത്രികളിലും ദന്തല് യൂണിറ്റ് ഉടന് യാഥാര്ത്ഥ്യമാക്കും. .
സംസ്ഥാനത്ത് സെറ്റ് പല്ലുകള് നിര്മ്മിക്കാന് കഴിയുന്ന 57 അക്രിലിക് ലാബുകളും സ്ഥിരമായി വയ്ക്കുന്ന പല്ലുകള് നിര്മ്മിക്കുന്ന ഒരു ഡെന്റല് സിറാമിക് ലാബും സ്ഥാപിച്ചിട്ടുണ്ട്. ഇത്രത്തോളം ലാബുകള് ദേശീയ തലത്തില് മറ്റൊരു സംസ്ഥാനത്തുമില്ല. ഇത് കൂടാതെയാണ് ദന്താരോഗ്യ രംഗത്ത് വിവിധങ്ങളായ പദ്ധതികള് സംസ്ഥാനം നടപ്പിലാക്കി വരുന്നതെന്നും മന്ത്രി വ്യക്തമാക്കി.