കാട്ടാക്കട: സിംഹങ്ങളില്ലാത്തതിനെ തുടര്‍ന്ന് നെയ്യാര്‍ഡാമിലെ സിംഹ സഫാരി പാര്‍ക്കിന് താഴുവീണതിനുപിന്നാലെ ബോട്ടുകളെല്ലാം കട്ടപ്പുറത്തായതോടെ ബോട്ട് സവാരിയും നിലച്ചു.
ജില്ല ടൂറിസം പ്രമോഷന്‍ കൗണ്‍സില്‍ നെയ്യാര്‍ ജലാശയത്തില്‍ സവാരി നടത്തിയിരുന്ന ഏക ബോട്ടും എന്‍ജിന്‍ തകരാര്‍ കാരണം കട്ടപ്പുറത്തായി.
15 പേര്‍ക്ക് കയറാവുന്ന രണ്ട് എന്‍ജിന്‍ ഉള്ള ബോട്ടിന്‍റെ എന്‍ജിനാണ് കഴിഞ്ഞദിവസം തകരാറിലായത്. രണ്ടുദിവസമായി കേന്ദ്രം പൂട്ടിയ നിലയിലാണ്. തകരാറിലായതുള്‍പ്പെടെ ആറ് പേര്‍ക്ക് കയറാവുന്ന രണ്ട് സഫാരിയും മൂന്ന് പേര്‍ക്കുള്ള ഒരു സ്പീഡ് ബോട്ടും അഞ്ചുപേര്‍ക്കുള്ള സെമി സ്പീഡ് ബോട്ടും ഉള്‍പ്പെടെ അഞ്ച് ബോട്ടുകളാണ് നെയ്യാര്‍ഡാം ഡി.ടി.പി.സിയുടേതായി ജലാശയത്തില്‍ മുമ്ബ് ഓടിയിരുന്നത്. വിവിധ കാരണങ്ങളാല്‍ ബോട്ടുകള്‍ ഒന്നൊന്നായി ഷെഡിലൊതുങ്ങി.
പുതിയ മൂന്നുപേര്‍ക്കുള്ള സ്പീഡ് ബോട്ട് ഒരു വര്‍ഷത്തിന് മുമ്ബ് മുങ്ങിപ്പോയിരുന്നു. ഇതിന്‍റെ എന്‍ജിന്‍ സര്‍വിസിനായി കൊണ്ടുപോയിട്ട് ഇതേവരെ തിരിച്ചെത്തിച്ചില്ല. പല ബോട്ടുകള്‍ക്കും ഫിറ്റ്നസും ഇന്‍ഷുറന്‍സും നേടാന്‍ കഴിയാത്തതും നീറ്റിലിറക്കാനുള്ള തടസ്സമാണ്. നെയ്യാര്‍ഡാമിലെത്തുന്ന സഞ്ചാരികളുടെ പ്രധാന ആകര്‍ഷണമാണ് ബോട്ട് സവാരി.
