കുവൈത്ത് സിറ്റി: യുക്രെയ്നില്നിന്ന് തിരിച്ചെത്തിയ വിദ്യാര്ഥികള്ക്ക് ഇന്ത്യയില് പഠന സൗകര്യം ഒരുക്കണമെന്നാവശ്യപ്പെട്ട് പ്രവാസി ലീഗല് സര്പ്പിച്ച ഹരജി ഡല്ഹി ഹൈകോടതി മാര്ച്ച് 21ന് പരിഗണിക്കും.
പ്രവാസി ലീഗല് ഗ്ലോബല് പ്രസിഡന്റ് അഡ്വ. ജോസ് അബ്രഹാമാണ് ഹരജി നല്കിയത്. മടങ്ങിയെത്തിയ മെഡിക്കല് വിദ്യാര്ഥികള്ക്ക് ഇന്ത്യയില് പഠനം തുടരാനുള്ള നടപടികള് സ്വീകരിക്കാന് കേന്ദ്ര സര്ക്കാറിനോടും ദേശീയ മെഡിക്കല് കമീഷനോടും നിര്ദേശിക്കണമെന്നാണ് ആവശ്യം.
കുറഞ്ഞ ഫീസ്, ഗുണനിലവാരം, വിദേശത്ത് പ്രാക്ടീസ് ചെയ്യാനുള്ള ലൈസന്സ് എന്നിവയുള്പ്പെടെ ഘടകങ്ങള് കാരണമാണ് ആയിരക്കണക്കിന് ഇന്ത്യന് വിദ്യാര്ഥികള് മെഡിക്കല് വിദ്യാഭ്യാസത്തിനായി യുക്രെയ്നെ തിരഞ്ഞെടുക്കുന്നതെന്ന് ഹരജിയില് ചൂണ്ടിക്കാട്ടി. യുദ്ധത്തില് തകര്ന്ന രാജ്യത്തുനിന്ന് തിരിച്ചെത്തിയ വിദ്യാര്ഥികളുടെ ഭാവി ആശങ്കയിലാകുമെന്ന ഭീഷണിയുണ്ട്.
അസാധാരണമായ സാഹചര്യം കണക്കിലെടുത്ത് അടിയന്തര നടപടികള് സ്വീകരിക്കാന് ഹൈകോടതിയുടെ ഇടപെടല് വഴിയൊരുക്കുമെന്ന് പ്രതീക്ഷിക്കുന്നതായി ഗ്ലോബല് പ്രസിഡന്റ് അഡ്വ. ജോസ് അബ്രഹാം, ഗ്ലോബല് വക്താവ് ബാബു ഫ്രാന്സീസ് എന്നിവര് വാര്ത്തകുറിപ്പില് പറഞ്ഞു.